Schnitzelbängg 2020 (Nit-Fasnacht)

---

• 
•  

Jä, als modärni Männer hämmer’s scho nit lyycht,
mir koche, wäsche, butze – bis jedes Stäubli wyycht,
unsri Fraue sin beschäftigt, uf Facebook alles z’laigge –
drum hämmer’s gar nit gmerggt, dass sii sin go straigge…
plus 50% Zueschlag:
Was mir aber gmerggt hän, mir hän’s miesse aggzebbdiere –
unsri Helgemoolere isch immer no am Broteschtiere…
© Fäldschnäggli '20

• 
•  

Jä, huescht – schnniif – schnuuder – mir gheere zu de Grangge,
schnuuder – huescht – schniif – hatschi – Gsundhait! Dangge!
Das isch nit s’Corona-Virus, wo-n-ys so loht niesse –
mir hän Eych numme welle uf Chinesisch do begriesse…
plus 50% Zueschlag:
Wobi mir das mitem Chinesisch hätte kenne bliibe loh –
s’het, so wie das usgseht, jo kai Chinese do…
© Fäldschnäggli '20

• 
•  

Jä, ich bi dr Schambbe, e Basler Bolizischt,
di falsche Bolizischte bschisse d'Lyt mit Lischt,
sie klaue s' Gäld vo de Biirger und sin drbi verglaidet –
y frog mi, was di falsche vo uns ächte unterschaidet…
plus 50% Zueschlag:
Y ka’s fascht nit sage, es fallt mir schambbar schwäär –
sii hän mi au verwitscht und jetzt isch mis Konto läär…
© Fäldschnäggli '20

• 
•  

Jä, sii hän dr Titel abgäh, sii draage-n-en jetzt nimm,
freiwillig, vo sich us, drum isch’s fir sii nit schlimm,
s’goht-ene viil besser ohni all die Titel-Sache –
und uns wurd’s besser goh, wenn das au YB so wurd mache…
plus 50% Zueschlag:
Doch laider längt das nit, mien mir Eych do brichte –
solang denn nit au freiwillig d’St. Galler dien verzichte…
© Fäldschnäggli '20

• 
•  

Jä, wottsch e Land regiere, dängg doch bitte dra,
fir sone Job muesch hytzedaags e dummi Friise ha,
dass e dummi Friise länggt, zem ganz an d’Spitze z’koh –
het-ys jo au scho mol e Maa us Öschtriich wisse loh…
plus 50% Zueschlag:
In dr Konsequänz haisst das, es isch eso per se –
statt em Marcel Koller muess dr Gress zem FCB…

© Fäldschnäggli '20

• 
•  

Jä, die Delifonkabine, die vom Barfi do,
sotte schyyns ins historische Museum koh,
denn stehn sii aifach hundert Meter wyter hinde –
vorusgsetzt nadyyrlig, dass die’se wieder finde…
plus 50% Zueschlag:
Wär nyt wird, wird Wirt, so haisst’s in unsre Braite –
und wär nyt ka, dä ka s’historische Museum laite…
© Fäldschnäggli '20

• 
•  

Numme in Oberwil gsunge:
Jä, d’Langmattstroos isch bachab – nai, es git’se nit,
au s’Kaffi im Coop isch zue, da’sch au nit so dr Hit,
mol yberlegge, was no gscheh isch – s’git sicher no vyyl –
ah nai, da’sch alles gsi, wo bassiert isch z’Oberwyyl…
plus 50% Zueschlag:
S’Guete an däm Bangg, wo mir jetzt do singe –
dä kasch logger au im näggschte Joor grad nomoll bringe…
© Fäldschnäggli '20

• 
•  

Jä, dr Hambbe Wessels, noch 11 lange Joor,
git si Amt jetzt ändlig ab, me glaubt’s nit, doch s’isch wohr,
s’bruucht e frische Wind, s’isch Zyt,  dass är jetzt goht –
mir hän scho Angscht gha, dass är blibt, bis s’Biozentrum stoht…
plus 50% Zueschlag:
Lieber wie s‘Ozeanium, hämmer dänggt drno –
hätt är‘s sotte mache und vo Afang a nit koh...
© Fäldschnäggli '20

• 
•  

ä, im Joggeli hän zwai ditschi Räpper welle räppe,
«Ou nai, das goht so nit!» sage d’Basler Fyyr-Schmiir-Läppe,
no sin sii halt uf Ziri - vilicht isch’s besser so –
will Schwoobe und Zircher hän bekanntlig s’glich Niveau…
plus 50% Zueschlag:
Und wo mir dänggt hän, s‘Niveau sig am Diefpunggt unde gstrandet –
isch doch brombbt in Ziri d‘Air Force One no glandet...
© Fäldschnäggli '20

• 
•  

Jä, dr Hamdi Halili - Trainerhose-Kosovar,
griegt z‘Buebedorf kai Schwizerbass, leggt Yspruch yy, da'sch glaar,
kennt är schutte «wie Behrami», wär är besser dra –
und hätt sicher au «bi Lara Guet» e gueti Chance gha…
plus 50% Zueschlag:
In Buebedorf dien sii sich ab Trainerhose steere –
in Basel wurdi är mit sälle zu dr Mehrhait gheere…
© Fäldschnäggli '20

• 
•  

S' CO² - Medley
(Melodie vo Status Quo - In the Army now)