Schnitzelbängg 2018
ui, das duet doch weh, au als Expärt so naimeduure,
doch sich allzu fescht beschwäre, duesch’en gar nit gheere –
dr Rolf kennt das no beschtens us dr Trainerkarriere…
© Fäldschnäggli '18
dr Brinz Harry duet hyyroote – e ganz e härzigs Ding,
ach, isch‘s nit e siesses Päärli, dr Harry und sy Büppi –
doch no vill siesser sin dr Sutter und sy Hüppi…
© Fäldschnäggli '18
das goht 200 Daag, koschtet 6 Milliarde Frangge,
doch statt so vill Gäld fir sone Saich ligge z’loh –
wurde sälli lieber ändlig hinter em Mond fiirekoh…
© Fäldschnäggli '18
in Luzärn findet me das jetzt nit grad rüüdig-toll,
e Schlag zmitzt ins Gsicht, sie fyyle sich betroge –
wie si sotte mit däm umgoh, wänn sie jetzt dr Fringer froge…
© Fäldschnäggli '18
s’wurdi sicher alles grad vo Schwoobe ybernoh,
kai Schwizer-Nati-Mätsch me, s’haut-ys us de Fuege,
will wurdsch denn garantiert nur no d’Schwoobe kenne luege,
und statt em Federer im Wimbledon-Final,
gsehsch e dytsche Rodler im’ne Schwizer Yyskanal,
d’Sändig Glanz und Gloria gäbti’s nimme lang,
fyr unsri Glepfer-Prominänz wär das dr Untergang,
ohni Aeschbi, das isch glaar, isch’s doch nimm dr Blausch,
will, wär do inne, Hand ufs Härz, luegt lieber Frauentausch,
au in dr Arena wird nimm bolteret und gfluecht,
stattdesse git’s e Dobbelfolg vo Schwiegerdochter gsuecht,
doch ebbis Guets hätt’s scho, das muess me aifach gseh –
s’kämt sicher au “kchän Böögg” und “kchäs Sachsilüüte” me…
© Fäldschnäggli '18
Schluss mit Stummel schbigge – abe zwische d’Glais,
drby isch doch dr Zigi-Teer, s’isch wirklig zem Erbebe –
s’ainzig, wo im Bahnhof duet die Waiche zämmehebe…
© Fäldschnäggli '18
das wär subber, gail und toll, will so bliibe mir am Ball,
au yber dr Schyssle ka me schliesslig Gschäftsmails chegge –
und ka glichzytig funggtioniere und drby verregge…
© Fäldschnäggli '18
e rote Gnopf ka ganz spezielli Funggtione ha,
wenn zem Byspiel aini us Verseh an Unterscht dra duet ko –
ka’s sy, dass mir denn dien e Rageetli styyge loh…
© Fäldschnäggli '18
doch das stimmt nit ganz, mien mir Eych jetzt do verrote,
mir mache’s wäg em Dringge, aber Bier wämmer nimm seh –
mir hoffe nach em Singe git’s do sone Fuze-Tee…
© Fäldschnäggli '18
Basel isch jetzt schyyns di kriminellschti Schwizer Stadt,
es wird ghaue und gschlage und me duet sich als me prigle –
drum wott dr Fringer schyyns – jetzt uf Basel zigle…
© Fäldschnäggli '18
(Melodie Strophe vo Trio - Herz Ist Trumpf, Melodie Refrain vom Stephan Remmler - Keine Sterne in Athen)
Jä, als Maa schloht’s ufe Maage, will fascht jedi Frau heersch klage… #MeToo, #MeToo
Lut de Fraue isch’s kai Frog – fascht alli Männer sin e Bloog… #MeToo, #MeToo
Beriehrsch e fremdi Frau ganz fiin, isch s’erschte Date e Grichtstermin… #MeToo, #MeToo
Luegsch ere Frau ins Decolleté, muesch rächne mit’re Revolté… #MeToo, #MeToo
Dr schwedisch Maa, jä, das isch glaar, muess vorem Aggt no zem Notar… #MeToo, #MeToo
Dr Brinz, wo si Dornreesli kisst, bald drufaabe d‘Freihait misst… #MeToo, #MeToo
Jä, Männer, Ihr miend aifach gseh, so wie friehner wird’s nie me,
und sicher nit schlächt isch, wenn nit Turnlehrer bisch…!
Kunnt aini im’ne Reggli knabb - wände mir ys sofort ab… #MeToo, #MeToo
Fyr unsri Närve isch es Gift, e fremdi Frau mit uns im Lift… #MeToo, #MeToo
Im Gartebad isch’s au nit schlau, schwimmsch Du hinter ere Frau… #MeToo, #MeToo
Und näb e Frau im 10er-Drämmli, sitze mir uf kai Fall nämmli… #MeToo, #MeToo
Nur no mit’re Augebinde, duet me-n-ys im Night-Clöb finde… #MeToo, #MeToo
Und sogar bim Porno glotze, hesch Angscht vor dene – s‘isch zem kotze… #MeToo, #MeToo
Mir hän jetzt au e Klaag am Hals - vor 40 Joor haige mir als,
De Miettere – wär hätt das dänggt – ungfroggt an Buse glängt…!
Wott ys e Granggeschweschter pfläge, simmer sofort sehr verläge… #MeToo, #MeToo
Zer Coiffeuse, s’sig Euch gsait, gehn mir numme no säb s‘ Zwait… #MeToo, #MeToo
E Sauna dien mir ys nimm a, will s’kennt jo dert au Fraue ha… #MeToo, #MeToo
Will unsri Bodys, wirklig wohr, bringe-n-ys dert in grossi Gfohr… #MeToo, #MeToo
Wenn aini sait "Du kasch mi näh", denn lehn mir ys das schriftlig gäh… #MeToo, #MeToo
Nur sicher wär’s fyr jede Maa – s‘hätt jedi Frau e Burka a… #MeToo, #MeToo
Doch bitte, Fraue, diend verstoh, de Gryysel sott’s an Krage goh,
doch Contenance isch gfrogt uf Ärde – will mir sunscht usstärbe wärde… :(
© Fäldschnäggli '18
D’Helge het gmolt d’ Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!