Bängg 2011

Schnitzelbängg 2011

Jä, an dr WM in Südafrika, heert me alli klaage
dä Lärm vo dene Vuvuzelas steert, isch kuum z’ertraage
Tröööööööööööööööööööööööööööööööööööööööööööö
ööööööööööööööööööööööööööööt……… nit rächt gheert
© Fäldschnäggli `11

Jä, Griecheland isch plaite, sälbscht dr Zais waiss do kai Root
in Irland, Schbanie, Bortugal frisst d'Gryyse s’letschte Broot…
au d’Belgier & d'Brite mien schbaare und das schwär
E volli Kasse hett - per se - nur e Fifa-Funggtionär
© Fäldschnäggli `11

Jä, unsri Basler Zitig isch ganz bees am Wangge
zummene Blocher-Barteiblatt sage mir: „Nai, dangge!“
doch jetzt sin mir froh hett si dr Suter ibernoh
befirchte aber dass sie zumene Flugblatt duet verkoh!
© Fäldschnäggli `11

Jä, wenn de hytzedaags duesch Schwizer Färnseh gaffe,
denn kennt me maine, dass deert nur dr Epiney wurd schaffe,
dr Epiney bym Jasse, dr Epiney bym Danze
dr Epiney bym Koche und dä hett nit mol e Ranze
dr Epiney isch do, dr Epiney isch deert,
dr Epiney hän mir au am Radio scho gheert,
dr Epiney bim Kampf der Keere und de greeschte Schwizer Hits
dr Epiney bim Schwizer Talänt, das isch kai Witz
dr Epiney by finf geg finf, är gfallt halt jedre Frau
jä nai, ou gopferdeggel, uf dämm Helge isch är au…
© Fäldschnäggli `11

Jä, dr Schaggi brucht acht Bier, dass är ka luschtig sy,
dr Schampe brucht fir das plus/minus 3/4 Fläsche Wyy
dr Schampe sait zem Schaggi: Dringg nit meh, als Du vertraisch
sunscht goht's Dir denn eso wie em Merz mit Bü-Bü-Bündnerflaisch…
© Fäldschnäggli `11

Jä, dangg dr Initiative darf me jetzt die Affe,
us em Usland, wo bleed dien, ganz logger useschaffe,
bleedi Affe us em Usland - zem Gligg isch's jetzt eso
will sie d'Kriterie erfille, mien au d'Zircher goh vo do
© Fäldschnäggli `11

Jä, mir 6 hän gwählt fir d‘ Glygge, e Obmaa s‘isch nid glooge,
wäg dr Diskretion hän mir das Ganze schriftlig duurezooge,
„Nai, är do isch’s nit worde und au ihm hän Stimme gfählt,
dr nei Breesi, dr Lumengo isch mit 1000 Stimme gwählt!“
© Fäldschnäggli `11

Jä, die Ainti maint: "Mi Schatz, ich vermiss Di jo eso!"
E Andri sait: "Mi liebschte Schbatz, wenn bisch wider mol do?"
Und Aini fleht und jommeret "Ich fihl mi so ellai!"
E Anderi froggt: „Jä gehmer jetzt zu Dir oder zu mir hai?“
Das hän nit unseri Fraue gsait, die dängge nit mol dra
das sin Uschnitt vo de Telefonprotokoll vom Kachelmaa
© Fäldschnäggli `11

Jä, s'Rauchverbott isch do, s'hett kai Qualm me in dr Luft
doch was drfir jetzt in dr Luft liggt, isch au kai Roseduft
Furz gmischt mit Schwaiss schliicht sich ins Näsli ganz verstohle
do gohsch au wenn nit rauchsch grad e Fümoar-Bass go hohle
© Fäldschnäggli `11

Jä, dr Moritz Laiebärger duet fidel frohlogge:
"Dr Durchstich isch gschafft, es haut mi us de Sogge!"
Me loht’s krache, d'Stimmig kocht, me fyyrt, danzt und lacht
ebbe so wie wenn dr Cavaliere Bunga-Bunga macht
© Fäldschnäggli `11

Dr FCB-Maischterfiir-Bangg...
(Melodie vom Harry Belafonte - Banana Boat Song)

O-lé, O-O-O-lé
Mir verzelle jetzt ebbis vom FCB
F-FCB-FCB-FCB-FCB
E Saison wie letscht Joor wämmer grad nomoll gseh
Dr Costanzo gumpt und fangt die Bäll
Dr Huggel dä isch grennt - und das sogar no schnäll
Dr Stocker bringt e scheeni Flangge
Dr Streller, dä stolperet und trifft im Wangge
Dr Shaqiri isch vomne andre Stärn
Dr Chippi us em Ämmital, drum hämmer ihn gärn
Und Abraham, Steini, Safari und Ferati
Wenn's hinde nit grad schloofe, sin’s aigedlig no Glatti
UND STOCKER, HUGGEL, STRELLER , GOOL
DR SCHIRI, DÄ GIT’S NIT, NAI ISCH DÄ HOHL
UND SHAQI, YAPI, CHIPPI GOOL
DR LINIERICHTER ISCH NO DR GREESSER PFOHL
Frei – Alex Fre-e-e-ei
Loss doch die Pfyffe pfyffe die hän ain - am - Gweih
Frei, bisch Okey, bisch Okey, bisch Okey
Als Antwort gits e Hättrigg - ZÄGG - ains - zwai –drei
D’St.Galler schiesse Millione y
Sin’s halt no bis Ändi Saison in dr Nati A drby
Luzärn spilt stargg, mir lipfe dr Huet
Drby sin die jo nur wäg unserem Haki guet
Au YB wott sich fiirezwänge
Mit Glygg – kennt’s fir - e zwait Platz länge…
No e Mannschaft glaubt, dass si e Chance hett
Das sin do die Deppe, vom FC Zett
Stell Dir vor, niemerds wurd ins Stadion koh
Die guete Spiler hän d'Stadt scho lang verloh
Dr Verain wär Plaite, hätt kai Gäld
Und gschbielt hättsch fascht uf em Brygglifäld
So, goht’s GC – eee
Aber alles wird besser……………in dr Nati B
So goht’s GC-goht’s GC-goht’s GC
Bald au de andere Duuble vom Zirisee
Dr Thorsten Fink isch zwar e Schwob
Mol aine, wo bruuche kasch, Gott lob
Und die, wo d’Oeri nimme wänn
Selle doch uf Sion, zem Constatänn
UND STOCKER, STRELLER, OFFSIDE, GOOL
DR SCHIRI, DÄ GSEHT’S NIT, WIE ISCH UNS WOHL
VILLICHT ISCH JO SINI BRILLE HI
AH NAI, ES ISCH DR CHIRCHETTA GSI
Cup, Meischterschaft und Champions League
Mir beglaite Di vo Sieg zu Sieg
Ändi Mai erwarte mir mit Giir
Denn singe mir uf em Barfi, an dr Maischterfiir
© Fäldschnäggli `11

D’Helge het gmolt d’ Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!