Schnitzelbängg 2015

---

• 
•  

Jä, im Basler Fraueli isch Frau no ganz fyr sich,
als Badmaischter e Maa goht dr Frau denn geg dr Strich,
wär das umgekehrt eso, wäre sicher alli froh –
nur vermuetlig wurde mir ine Männerli nit goh…
© Fäldschnäggli '15

• 
•  

Jä, e Saubannerzug im Grais Finf und im Grais Vier,
kabutti Schiibe und Auti, sie verhalte sich wie Dier,
sie zersteere ihri aigni Stadt, das isch scho dramatisch –
aber no vil schlimmer isch, das macht sie no sympathisch…
© Fäldschnäggli '15

• 
•  

Jä, dr FCB stoht in dr Tabälle ganz obe,
fyr das sott me doch au dr Heusler Bärni emol lobe,
dass dr FC - Luzärn fascht numme no verliert –
das het fyr uns zem Dangg dr Alex Frei organisiert…
© Fäldschnäggli '15

• 
•  

Jä, d’Milo Moirée – und das während dr ART,
splitterfaserblutt mitem 6er-Drämmli fahrt,
wo sie denn unde Aier usedruggt – do hämmer’s tscheggt –
wo das gsteerte Huehn  - ihres Drammbillié versteggt…
© Fäldschnäggli '15

• 
•  

Jä, „Je suis Charlie“ – die ganzi Wält macht mit
Und s‘Pletzlig uf dr Wält Millione Charlies git
Zem Gligg isch das z’Paris gsi und nit bi dr NZZ
Will sicher niemerds gärn „Je suis Zircher“ schreie wett
© Fäldschnäggli '15

• 
•  

Version Oberwil:
Jä, do nämme mer e vier – und näbedra e zwai
Hinde dra no e paar null, sunscht isch die zwai eso ellai
Denn wird alles kehrt – nai, s’isch nit zem lache
Genau eso duet s‘ Lotti Stokar ihres Budget mache

Version Basel:
Jä, do nämme mer e vier – und näbedra e zwai
Hinde dra no e paar null, sunscht isch die zwai eso allai
Denn wird alles kehrt – nai, s’isch nit zem lache
Genau eso duet d’Eva Herzog ihres Budget mache
© Fäldschnäggli '15

• 
•  

Jä, dr Gerri Müller – die ganz Nation het g’lacht,
het e Selfie vo naggte Tatsache gmacht,
Är hätt’s doch selle wisse – mir hän’s ihm jo no gseit –
Dass d‘ Wält nach dr Conchita Wurscht – kai Wyrschtli meh verdrait!
© Fäldschnäggli '15

• 
•  

Jä, vili vo uns maine, dass är nit richtig tiggi,
dr Herrscher vo Korea-Nord, dr Kim Yong Un, dr Diggi,
doch s’ainzig, wo dä will, s’isch gar nit so verruggt –
isch dass me ihn ufs Deggeli vom’ne Kaffirähmli druggt…
© Fäldschnäggli '15

• 
•  

Jä, in Zug die grien Jolanda & dr Hürrlimaa
Häns mit sim glaine Hürrlima anschynend luschtig gha
Är muess jo ganz e Glaine ha-mir sin im Glaube gsterggt
Sunscht hätts die Ander sicher nit am nägschte Daag erscht gmerggt
© Fäldschnäggli '15

• 
•  

Jä, bim Start in d’Euro-Quali – isch d’Nati ziemlig gschwumme,
so ainiges het dert bim beschte Wille nimme gstumme,
taggtisch verbessere kenntsch no e Huffe Sache –
wie efters Dobbelbässli statt Dobbeladler mache…
© Fäldschnäggli '15

• 
•  

Jä, #Fasnacht und #Schnitzelbangg
Jä, #luschtig und #Gottseidangg
#Wysswyy will #mirjetztainnämme
#Fäldschnäggli und #salizämme
© Fäldschnäggli '15

• 
•  

S‘ Euro – Liedi 2015
(Melodie vo EAV - Burli)

Jä, dr Mindeschtkurs gilt nimm und dr Euro, jä, dä gheit,
doch die Aggzion, jä, die isch abverheit,
dr Euro kriegsch jetzt fir e Stutz, mir mache-n-ys GEdangge,
wo mir schnäll ins Elsass sin go tangge,
mir wän au no baar Euro ha, drum styyre mir di nägscht Bangg a,
e Riiseschlange vornedra, doch Euro – het’s nimme gha…

Und gohsch emol in d’Innerstadt, fir d’Laadebsitzer isch’s nit glatt,
drum heert me sälli mächtig briele,
Kunde het’s fascht kaini me, und an de Wiehltisch kasch nimm gseh,
wie wild sie drinn dien ummewiehle,
und bi dr Stiggi s’isch e Hohn, het’s nur Lyt an dr Drammstation,
wo dert wartend ummestehn, bis sie denn – uf Wail in Marggtkauf gehen…

Aber unsri Schwoobefrinde finde’s nit so toll,
will ihri Lääde sin jetzt immer grammlet voll,
doch ehrlig gsait isch’s so, wenn mir dien naime anegoh,
sin doch immer – d’Schwoobe au scho do,
doch ebbis muess me scho no gseh, drum singe mir: „Juhee, juhee!“
Kai Mindeschtkurs das haisst per se – am Schiilift – het’s kaini Schwoobe me!

D’Moral vo dere Gschicht wämmer Eych nit vorenthalte,
will stargg wird sich vo schwach abspalte,
genau wie alt vo neu, trennt sich dr Waize halt vom Spreu,
und dr Spägg, dä trennt sich vo de Säu,
mir kenne das jo beschtens do, will und goht’s jo scho länger so,
di Schwache het’s no immer gno – drum wird dr – FCB – au wieder obe stoh…
© Fäldschnäggli '15

D’Helge het gmolt d’ Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!