Bängg 2013

Schnitzelbängg 2013

Jä, by uns in dr Schwiiz git's scho superstarggi Margge
Ricola & Rivella gheere sicher zu de Stargge
nomen est omen, s’zellt dr Namme fascht elai
drum haisst em Suter sy nägscht Firma statt Hello au grad Good bye
© Fäldschnäggli `13

Jä, dr Pipi Streller – es isch e biz bizar
het zem sy Zingge z’schitze, drait e modisch Aggsesuar
mit sym mäsggligschitzte Zingge drifft är s‘ Gool, nid nur dr Pfoschte
letschti hämmer dr Alex Frei gseh sone Mäsggli boschte
© Fäldschnäggli `13

Jä, lägg, sin mir fit, es isch phänomenal
sin voller Energie, es isch scho fascht brutal
mir syn au bletzlig schnäller und fyyle-n-ys Ains A
mir hän vorhär zem Apéro e Armstrong-Cocktail gha
© Fäldschnäggli `13

Jä, "Ze Dir oder ze Mir" sait d'Stadt ze Baselland
"mir gheere aigedlig zämme, kumm mir gehn biz Hand in Hand"
"das chönnä mir scho machä, aber loosed liäbi Lüt
ihr müesset Euch bewusst sy, zahle düe mir nüt"
© Fäldschnäggli `13

Jä, s’het bolteret bim FCB – dr Heiko het uns verloh
um’s wieder besser z’mache, isch dr Muri jetzt heiko(h)
dr Entschaid het iberrascht – doch Fraid folgt uf Entsetze
s’zaigt halt, dass es guet kunnt, wenn me Schwoobe duet ersetze
© Fäldschnäggli `13

Jä, Znacht isch aine danzend dur d‘Staine flaniert,
d‘ Schugger hän’en paggt, zämmegschniert und denn abgfiehrt,
in d‘ Psychiatrie hän’s en gsteggt, är findet’s gar nid gail –
s‘isch nämmlig dä Typ gsi vom Op-Opan-Gangnam-Style…
© Fäldschnäggli `13

Jä, hän ihr scho mol das Dschungelcamp am Schwoobefärnseh gseh
Die ässe Kakerlake mit Kängaruhoode-Gelée
Drzue bitz Hirn vom Schoof, si wirge und hän mieh
Die kennte sich jo grad so guet e Kebab ynezieh
© Fäldschnäggli `13

Jä, d'EU zahlt e Milliarde an unsri ETH
mir haige s'bescht Projäggt zem Thema Hirnerforschig gha
drmit's biz schnäller goht, wänn mir do e Rotschlag gäh
sotte sie zem Untersueche e Zircher Hirni näh
© Fäldschnäggli `13

Jä, nochdäm är an dr Uni nymm erwynscht isch, maint dr Mörgeli
das isch nid so schlimm – do mach ich mir doch kaini Sörgeli
„Ich mach jetzt mini aigeni Dänggfabrigg - bi doch nid dumm
und die finde ändlig use wie ich s‘Grinse wägbikumm…“
© Fäldschnäggli `13

Jä, will's Drei Keenig scho voll gsi isch, het d'Regierig welle
fir d'Asylante sone Luxusschiff ans Rhybord stelle
Asylante uf e Schiff z’due, das isch doch absurd
will’s zem Koks abfille aifach vill z'fescht schwangge wurd
© Fäldschnäggli `13

Jä, an dr Uni-Mensa syn d'Vegis schwär am hetze
me wott mit Gmies und Sprosse in Zuekunft s'Flaisch ersetze
d'Folge vo däm Due wurde vyli nit ertraage
will denn wurde d'Mediziner an de Lyyche ummenaage
© Fäldschnäggli `13

Jä, dr Muurer Ueli isch jetzt Breesi vom Bund
jä, me ka das scho so sage, är isch scho e gaile Hund
ins Usland sell dr Burkhalter, das verdient Respäggt
dr Ueli kennt halt d'Nochdail vo sym Zircher Dialäggt
© Fäldschnäggli `13

Jä, e Kaffi am Pischterand will s'Vreni Schneider ha
doch so wie sie singt, het's z‘vill Schnapps im Kaffi gha
wenn me als Schwizer-Skistar mol so ände sott
isch’s kai Wunder, dass dä Winter kaine gwinne wott
© Fäldschnäggli `13

Jä, ohni Uniforme goht unsri Hailsarmee
unter eme falsche Namme, an dä ESC
jetzt sin alli häbbi und finde’s guet eso
will mit „Hail“ und „Armee“ ischs no nie guet uusekoh
© Fäldschnäggli `13

Jä, d’Affe, die sin zrugg, in unsrer scheene Stadt,
in ihrem neye Affehuus finde’s sälli glatt,
an aim vo dene Keefig kläbbt e „VORSICHT BISSIG“-Kläber
und hindedra fluecht und tobt dr Eric Wäber
© Fäldschnäggli `13

Jä, unsri BVB organisiert e Wahlkampagne,
mintgrien, blattgrien, froschgrien oder vert de champagne,
mir sehn kai grosse Unterschied zwysche sälle Grien –
will mir egal by wellem grien, e saudyyr Billié leese mien...
© Fäldschnäggli `13

Jä, by dr Lätti hänggt e Schild „Geschlossen definitiv“
au dr Oggse macht nym uf, dert het’s scho vyl z‘ vyl Miif
mit de Baize z‘ Oberwil goht’s Bach ab und zwor wie gschmiert
hätte mir doch numme nie dr Lätte bangsioniert
© Fäldschnäggli `13

D’Helge het gmolt d’ Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!