D’ Gschicht vo dr Fäldschnäggli-Bangg-Clique 1994

1993

Jä, lang, lang isch es här, syt emol e paar jungi Bursche us em Bermuda-Dreiegg Oberwil – Därwil – Biel-Bängge uf d’Idee koh syn, an dr Fasnacht nit numme passiv, sondern au aggtiv dail z’näh. Gnau gno het das Ganze im Joor 1993 agfange so langsam Forme a z’näh. Me het sich alässlig dr Binniger Fasnacht troffe und gfunde, dass me sich eigentlig nümme länger dr Fasnacht sotti vorenthalte. Wie’s aber by alle guete Sache isch, und das sait jo au s’Sprichwort: „Gut Ding will Weile haben“, hänn die paar Bursche denn doch e biz e längeri Alaufzyt miesse in Aschpruch näh.

 

1994

An dr Binniger Fasnacht 1994 het’s aber s’Schiggsal guet mit uns gmaint und uns in dr Truube dr Tineli Gschwind loh kennelerne. Das isch d’Vorussetzig drfür gsi, dass es denn ändlig vorwärts gange isch und mir mittlerwyle scho zwanzig Mol an ere Fasnacht mitgmacht hänn.

Zwüsche dr Fasnacht ’94 und unserem offizielle Gründigsfescht het sich Folgendes abgschpielt: Dangg em Tineli syne Beziehige und syne Erfahrige punggto „Sälber-Fasnacht-mache“ syn mir zu eme Waagebauplatz, eme Waage und Wurfmaterial, sprich zu so ziemlig allem koh, wo me für e Fasnacht so ha sott. Mit so Vorussetzige het’s denn au nümme vyl brucht, e paar z’finde, wo mitmache würde und Ändi 1994 isch d’Fäldschnäggli – Clique Oberwil gründet worde. Unseri Gründigsmitglieder syn gsi: Dr Dominik „Brodi“ Brodhage, dr Kristian „Nöggi“ Müller, dr Christian „Harry“ Harr, dr Reto „Schäri“ Schärer, dr Kevin Kleiber, dr Philipp „Werni“ Werner, dr Sacha Fey, dr Michel „Däge“ Degen und dr Emanuel „Emi“ Kouril. Und us dä obegnennte Gründ isch dr Tineli syt dr Gründig unsere Ehrepresidänt.

Am 17. Dezämber 1994 isch denn unsers Gründigsfescht in dr Wehrlinturnhalle z’Oberwil über d’Bühni gange. Das Fescht isch zwor zum Dail als Gründig vo dr Wehrlinturnhalle missverschtande worde, isch aber, zum dene Grücht ändgültig e Änd z’setze, s’Gründigsfescht vo de Fäldschäggli gsi. D’Halle isch voll gsi, was uns sehr positiv überrascht het, und mir hänn im Dorf e erschti Duftnote hinterloh.

 

1995

Nochhär hänn mir uns s’erschti Mol dörfe in d’Fasnachtsvorbereitige schtürze, wo mir nit ohni Leerläuf, mir erinnere uns an d’Versiech vom Däge e Leitere z’konschtruiere, aber schlussändlig doch zu allsytiger Zfriedeheit hänn bewältige könne. Mit em Sujet „Park & Ride“ und eme Waage mit eme Auto obedruf hänn mir 1995 unseri Premiere an dr Oberwiler Fasnacht dörfe fyyre. Gwüssi Zueschauer hänn dr Unterbau vo unserem Gfährt zwor als Bus identifiziert, obwohl klar erkennbar gsi isch, dass es sich um e Drämmli handlet, was unseri Freud drüber, s’erschti Mol drby gsi z’sy, aber nit im Gringschte het könne schmälere.

Nachdäm mir di erschti Fasnacht einigermasse verdaut gha hänn, syn mir vor folgendem Problem gschtande: Wie kriege mir das Auto wieder vom Waage obenabe und vor allem: Wo kah me so Autos entsorge? ...s'isch jetzt ämmel nümme uf em Waage und au nümme uf em Buurehof vom Andi Ineichen, das isch dr Bruederholzhof, wo mir syt em erschte Joor unseri Wääge dien baue. Und vo däm Park & Ride-Waage lauft uns sogar hüt no, das isch mittlerwyle immerhin siebe Joor schpöter, s'eint oder ander agmolte Brätt über e Wäg.

Unsere erschte Bummel im Summer ’95 isch vom Werni und vom Kevin organisiert worde und het uns uf Sattel in dr Zentralschwiz gfiehrt. Dört syn mir gsi go „Summerbob“ fahre, in ere Zivilschutzalag go übernachte (me erinneret sich an agnähme Duft am nägschte Morge dört inne), und hänn au suscht vil Amüsants erläbt. Am Sunntig hänn mir em Alpamare d’Ehr erwyse.

Mutation: Nach numme eim Joor verloht uns dr Brodi.

 

1996

1996 - notabene in unserem zweite Joor als Aggtivfasnächtler - syn mir, wie alli das jedes Joor syn, vor dr schwierige Ufgob gschtande, e guets Sujet z'finde. Und was au alli andere beschtens kenne wärde: Mir hänn us ere Rieseuswahl an megaguete Sujets dörfe uswähle! S’isch nit eifach gsi, aber schlussändlig hänn mir uns für „z’Oberwil wird’s Liecht“ entschiede. Es isch drum gange, dass di katholisch Kirche e neui Belüchtig bikoh het und me z’Oberwil jetzt znacht besser dr Heiwäg findet, will nätterwys  d‘Kirche vo jetzt a in dr Nacht ihres Liecht duet ussände.

Als Mönch verkleidet und mit ere Kirche mit eme Storchenäscht obedruf als Waage isch au unseri zweiti Fasnacht e gueti Sach gsi. Mit unserem Motto: „Tritt ein, bring Bier herein“, wo au über dr Tür vom Waage gschtande isch, hänn mir e dängg-würdige Joorgang ’96 erläbt.

1. Birsigtaler – Clique – Grümpeli: Unseri Clique veraschtaltet zämme mit de „Giftschnägge“ s’erschti Clique – Grümpeli uf em Isweiher in Oberwil. Es isch e Idee gsi vom René Banholzer, wo so het könne realisiert wärde, und wie me mittlerwyle het feschtschtelle könne, isch durchus d’Nochfrog für so e Alass vorhande. Dangg dr grosse Hilf vom Tineli, vom Thomas Schmidt (Kölle) und vo vile andere nätte Hälfer und Hälferinne, isch’s mit über vierzig Mannschafte e volle Erfolg gsi. S’Feschtzält isch an zwei Öbe gfüllt gsi und s’het e Superschtimmig gherrscht – merci nomol an alli, wo uns gholfe hänn.

Dr Bummel 1996 het im Bündnerland, in dr Umgäbig vo Chur stattgfunde.  E Rundi „river rafting“ am Samschtig uf em Vorderrhy (ein vo uns mit ere agehende Lungeentzündig), e Usgang in dr grosse Churer Discoszene (e paar goldigi Auge löhn griesse), e Übernachtig uf eme Fäld im Zält (dr gröscht Kritiker vo dere Übernachtigsvariante isch dr erscht gsi, wo im Zält gläge isch) und e Bsuech vom Schwingfescht in Prattele (dä isch by alle Cliquemitglieder super akoh) hänn dr Emi und dr Harr organisiert gha.

Mutatione: Nach zwei Joor verloht uns dr Nöggi. Neu drzue kömme, nach beschtandener Ufnahmepriefig (e Beizetour im Summer mit Goschdym und Lernfahrer-L und e luschtigs Roteschpiel mit Schnäpslisuffe by falsche Antworte) dr Dominique „Zini“ Corazzini und dr Räto „Böde“ Schluep.

 

1997

Im dritte Joor hänn mir, dr eint oder ander kennt’s us eigener Erfahrig, dr FC Oberwil zum Sujet erkore. Dä het s’50 Joor Jubiläum gha und drum het unser Sujet „50 Jahre – Pleiten, Pech und Pannen“ gheisse. E Fuessballer – Goschdym hänn mir azoge, uf em Waage syn mir in Goal gschtande und obedruf hänn mir e überdimensionale Kickschueh montiert gha. Ei Schpruch uf em Waage het folgendermasse g’ändet: ......wär ihn ha will, söll ihn hole (s’isch glaub um e domolig Trainer vo dr zweite Mannschaft gange). Eimol mehr isch’s e tolli Fasnacht gsi und au vo dere wird immer no ab und zue e Aneggdötli verzellt (z.B. was die zwei Neue für Hüetli hänn miesse azieh...)

2. Birsigtaler – Clique – Grümpeli: Mir hänn us de verschiedene Panne by dr Premiere  glernt und e paar Sache könne besser mache. S’hänn wieder zahlrychi Teams mitgmacht, am Obe im Zält hänn Guggemusige gschpielt und au dr Petrus isch uf unserer Syte gsi. Merci an alli, wo uns wieder unterschtützt hänn, au an sälli, wo s’erscht Mol drby gsi syn.

Im ’97 isch dr Bummel in d‘Romandie gange. Nach eme Bsuech vo dr Saline in Bex, syn mir uf Montreux, wo mir dr Obe im Casino verbrocht hänn. Zwei vo uns hänn dört e guete Uftritt gha und eine het, wo mir alli no fascht blutt(!) syn in See go bade (öbbe am drei am Morge) e Boie welle „heitauche“ zum si am ene andere „dr Ranze durab z’schloh“. Dummerwys isch si ibetoniert gsi, „die Saumätz!“!!!

Am Sunntig nach däm fiecht-fröhlige Obe in Montreux isch denn sinnvollerwys e Wyydeguschtation uf em Programm gschtande. Wo d’Deguschtation verby gsi isch, isch by alle öbbis ufgwärmt oder sogar scho wieder neu erwärmt gsi. Mir hänn uns denn uf e Heiwäg gmacht und wo mir wieder zrugg gsi syn, syn d’Wyykäuf verschwunde und ein vo uns am „Wärfe“ gsi. E guete Bummel also.

 

1998

„Was für e Uswahl an guete Sujets!“ Entschiede hänn mir uns wäg em Wirtewäxel und de neue Sitte im Reschtaurant Rössli für s’Sujet: „Zum weissen Röss’l“. Mir syn als Köch unterwägs gsi und uf unserem Waage, usnahmswys emol eistöggig, hänn mir e schön deggte Tisch und im Hintergrund e Ross us Schtyropor gha. S’Ross het dangg ere Näbelmaschine prächtig zum Mul us graucht, doch vom schön deggte Tisch het’s Publikum, do mir vergässe hänn für s’Wurfmaterial no e biz Platz übrig z’loh, leider, leider nit vil gseh. Me kah jo au nit immer an alles dängge. S’Ross hänn mir denn übrigens irgendwo zwüsche Ettige und Därwil verlore. Wie ächt das wieder zue- und härgange isch...

Am Masggeball syn mir als Köch in dr Wehrlinhalle go grilliere und hänn prompt no e Bryys abgholt.

3. Birsigtaler – Clique – Grümpeli: S’dritte Mol kai Räge, s’dritte Mol e stattligi Teilnähmerzahl und s’dritte Mol e geils Fescht! Mir dängge dra e grössers Zält z’organisiere für s’nägschte Joor. Unsere Dangg usschpräche wänn mir wieder unsere Hälfer und Hälferinne, alle Mann- und Frauschafte, wo am Turnier mitgmacht hänn und natürlig au suscht jedem, wo verby koh isch. Nit unbedingt dene, wo uns mit ihre Regglamatione s’Läbe schwer mache oder gwüsse Polizischte, wo uns hänn welle dr Schtrom abschtelle.

Unsere Cliquebummel isch im ’98 vom Fey und vom Schäri uf d’Bei gschtellt worde. Am Samschtig syn mir in Europapargg, wo uns aber eher d’Beize als d’Bahne agschproche hänn. Unseri wohri Schtärggi isch denn by so eme Rytterschpiel voll zum Trage koh. Alli zämme hänn mir sicher öbbe fünf Europaparggkaffitasse abgrumt! Zobe hänn mir uns by eme Rittermohl dr Ranze vollgschlage, bevor mir z’Freiburg no e paar Discos unsicher gmacht hänn. Ein vo uns het dört e guete Uftritt gha, zwei anderi, will si nümme gwüsst hänn, wo s’Hotel isch, für e 300 Meter lange Wäg miesse s’Taxi näh. Ein isch eifach am Sunntigmorge wieder uftaucht...

Dr Sunntig isch dr absoluti Höhepunggt vo allne unsere bishärige Bümmel gsi: Mir syn ins Freiburger Fasnet Museum gange und hänn dört dörfe Millione vo verschiedene „Häs“ (so heisse dört d’Goschdym) beschtune. Das isch wahnsinnig interessant gsi und zum Schluss hänn mir sogar no e Orde bikoh (wahrschinlig will mir uns das soooooolang atoh hänn!) S’schtoht z’vermuete, dass kain vo uns das ischniedende Erläbnis jemols vergässe wird. 

 

1999

Mir schtürze uns in unseri fünfti Oberwiler Fasnacht. Dr Clinton het z’Amerika e Skandal bote gha, was denn au unsers Sujet worde isch. Unter em Motto: „In sex we trust“ hänn mir als Clintons mit Gummimasgge (s’isch ziemlig heiss gsi drunter) vor eme „Wysse Hus“ unseri zwei Runde um e Dorfbrunne zrugggleggt. Unverschämt tüüri Goschdym hänn uns nit drvo abghalte ein dure z’gäh und so könne mir jetzt uf e glunges, erschts Jubiläum zruggluege.

4. Birsigtaler – Clique – Grümpeli: Mir fange langsam uns z’wiederhole. Merci Wätter, merci Gmeind, merci Polizei, merci Hälferinne und Hälfer, merci Awohner, merci Fasnachtsclique, merci Schponsore, merci allne! Zwar e Chrampf, aber e guets Gfühl bym Bligg ins volle Feschtzält. Uf e Neus im 2000!

Und wieder wird bummlet: Dr Harr und dr Kevin entfiehre uns in d’Innerschwiz, wo mir am Samschtig mit so komische Böötli e Fluss durabgfahre syn. Zum Glück hänn die uns überhaupt loh fahre und schad het dr eint das mit em Ruedere nit besser im Griff gha. Nochhär hänn uns dr Thierry und d’Anja in Stansstad (oder nit?) bewirtet und denn uf Ängelbärg gfahre. Dört isch Zobe in dr „Schpindle“ dr Bär los gsi.

Am Sunntig e Kutschefährtli durch Ängelbärg, denn für zwei e Bad im Triebsee und aschliessend e Trotinettrenne dr Titlis durab. Unterwägs e Imbiss by de Mönche „Brueder Olah, Brueder Tineli und Brueder Kölle“. Denn in Rekordzyt  uf di günschtig Tribüne uf dr Schützematte. E FCB-Match schpöter isch au dä Bummel verby gsi.

Mutatione: Neu kömme nach beschtandener Ufnahmepriefig (Bier exe, Schwimmflosse, Hawaiihemmli und Radlerhose montiere, Beizetour mit Uflage, Shoppe im Coop, em andere s’Bei rasiere, mit de Flosse uf Biel-Bängge laufe und unterwägs zwei BH’s uftriebe, e luschtigs Roteschpiel mit Schnäpslisuffe by falsche Antworte und no in d’Fratze-Bar schpaziere) dr Remo Bucheli und dr Alexis Döggi drzue.

 

2000

In däm Joor hänn mir usnahmswys emol kai Waage baut, sondern hinter em Rössli e Bar betriebe. Die Bar isch super gloffe (mir wüsse immer nonig, wär sich hinter em Barzält unsittlig verhalte het!) und am Umzug syn mir eifach mit eme fahrende Barelemänt unterwägs gsi.

Drzue koh syn denn s’erscht Mol unseri Schnitzelbängg. Ohni falsche Reschpäggt hänn mir dä Schritt gwogt und syn zu unserem Erschtune vom Publikum sehr wohlwollend ufgnoh worde. Mir uf jede Fall hänn Bluet gläggt und wärde nümme so schnäll drvo ab z’bringe sy, au wyterhin Bängg go z’singe. Mir syn denn au no in d’Stadt in dr Wuche druf und au das mache mir uf jede Fall wieder.

5. Birsigtaler – Clique – Grümpeli: Wieder Super-Wätter, wieder e biz mehr Teams, no besseri Goschdym, no mehr Feschtbsuecher, wieder kai Unfäll – was will me no mehr? Au unsers fünfjöhrige Jubiläumsgrümpeli het z’Oberwil e guete Aklang gfunde, sodass mir wiederum allne, wo uns in irgendere Form unterschtützt hänn, zu Dangg verpflichtet syn. Gracias!

Am vom Zini und vom Emi organisierte Bummel 2000 hänn fascht alli Fäldschnäggli fliege glernt. Nur s’einte het nit so rächt welle abhebe. Sälle het statt „bodyflying“ offesichtlig „bodylying“ betriebe.

Denn isch me go Golfe und aschliessend het di ganzi Sach, nach eme guete Nachtässe, an ere Schumparty e Wändig gnoh, wo mir an dere Schtell nit nöcher druf igoh wänn. Am Sunntig syn mir alli topfit go Wasserskifahre und denn Zobe relaxt, erhohlt und usgruiht wieder heikoh.

Mutatione: S’verloht uns dr Michel Däge, nachdäm är immer überall vil gholfe het, langi Zyt Kassier gsi isch, aber leider nit gross zum eigentlige „Fasnachtmache“ koh isch. Merci Däge! Neu drzue kömme nach beschtandener Ufnahmepriefig (warms Bier exe, Windle und Babyhube montiere, vor em Coop go Schnägge verkaufe, e Beizetour mit Trotinett und Uflage, e Trotinettfährtli in d’Stadt mit eme luschtige Roteschpiel mit Schnäpslisuffe by falsche Antworte zwüschedure, e Mc Donald’s Bsuech und e Abschlussschnäpsli plus Abschlussverarschig) dr Tobias „Mamba“ Baumann und dr Thierry Wagner. 

 

2001

Dur unsere Cliquenamme syn mir fascht zwunge worde das Joor s’Sujet “Fäldschlössli” z’näh. Mir hänn e Fäldschlössli uf e Waage baut und uns als Uslieferer verkleidet. Zudäm hänn mir s’erscht Mol e Vortrab gha, wo vor unserem Waage gloffe isch. Dass denn sälle in dr Zytig koh isch, isch jo Näbesach.

Au syn mir wieder go Bängg singe und nach dr Resonanz, wo het könne erzügt wärde, wärde mir das fortsetze. Es isch scho schön fescht z’schtelle, dass no anderi e ähnlige Humor hänn. Nit by alle Bängg hänn mir vo däm könne usgoh...In dr Stadt isch’s au wieder sensationell gsi, sodass mir nach zwei Joor doch scho e gwüsse Schtandard erreicht hänn. Merci fürs Zuelose!

6. Birsigtaler – Clique – Grümpeli: Schöner, grösser, besser, töller – e Traum! Mir umarme d’Wält und sage e ganz härzligs DANGGSCHÖN!!! Vor allem em Babseli!

Dr Bummel, e paar rede nit zu Unrächt vo eme Usflug, het uns uf Interlake gfiehrt. Vorhär syn mir no gsi, dr St. Jakob’s Park go besichtige. Dr Bucheli het dä Event leider verpasst, will är, obwohl är am Obe vorhär no alli ermahnt het, nit z’schpot ins Bett z’goh, sälber z’schpot in s’Näscht isch! In Interlake hänn mir denn könne go Gleitschirmfliege, was eigentlig di einzig vo dene vile akündigte Attraggtione gsi isch. Zobe hänn mir, nach eme guete Nachtässe, im Goldige Anker ein duregäh. Dr Zini het d’Band, wo gschpielt het, beeländet und zwei Japanerinne dr Obe verdorbe. Dr Kevin und dr Harr syn denn so lieb gsi und hänn die zwei e biz tröschtet.

Am Sunntig syn mir mit dr Riesemöchtegärnattraggtion Dracheschiff zu de Beatushöhle gfahre, wo mir hänn dörfe e Höhlebär bewundere. By däm wunderschöne Ablick hänn mir sogar fascht vergässe, dass mir zu dene **+!!?!*”??+*-höhle hänn miesse schtundelang e massiv schteile Bärg duruflaufe...

Wo mir denn wieder uf s’Schiff gwartet hänn, isch dr Ruef nach ere “Task Force Bummelrettig” lut worde, s’het allerdings nümme vil könne grettet wärde. Zwei nit vom Bummel – OK Alexis und Bucheli  z’verantwortendi Schlussattraggtione hänn uns in Spiez denn aber doch no einigermasse versöhnlich gschtimmt: Dr Kevin isch mit de Kleider in See gumpt und mir hänn e Schiffskapitän könne zum Wingge bringe! WOW!!!

 

2002

Vom Blitz troffe!!! Was für e wundervolle Namme für e Fasnachtssujet! Dr Hintergrund vo unserem Sujet isch gsi, dass d’Schwizer Privatfärnsehsänder hänn miesse dr Lade dicht mache, was jo unserer ehemals schtolze Swissair au passiert isch. S’syn somit alli vom Blitz troffe worde... Unsere Waage isch e Bar gsi, in Aschpilig uf sälli Sändig uf TV 3. Mir hänn wyssi Goschdym a gha, will dass in däm schwarze Waage halt eifach mächtig guet usgseh het. Unsere Vortrab isch wieder mit vo dr Partie gsi, agfiehrt das Mol vo eme gwüsse Christoph Blocher, wo sich denn im wytere Verlauf vo dr Fasnacht no mit eim us unserer Clique im Bäre als Wal versuecht het...

Dr Hammer isch gsi, dass afangs Umzug drei knapp bekleideti Dame unsere Waage gstürmt hänn! Mir syn also scho grad e biz baff gsi und syn hüt no am Rätsle, wär das ägscht könnti gsi sy...

Mit unsere Schnitzelbängg syn mir denn am Zyschtigobe wieder dur Oberwil zoge und syn, das dörfe mir offe und ehrlig zuegäh, vo de Zueschauerreaggtione richtiggehend überwältigt gsi. S’isch jo nit eifach, e hochs Niveau z’halte, aber uns schynt das eimol me richtig guet glunge z’sy. Au in dr Stadt syn mir im 2002 dur d’Cliquekäller zoge, was uns mächtig Schpass gmacht het. Me muess sich das emol vorstelle: Die Lüt in dene Käller hänn unseri humorvolle Darbietige absolut vollluschtig gfunde!!! Für e Schnitzelbänggler isch das natürlig dr schönschti Lohn für e doch nit zu verachtende Ufwand, wo drfür betriebe wärde muess.

7. Birsigtaler – Clique – Grümpeli: Dr Petrus isch e Fäldschnäggli! S’siebte Mol hinterenand wunderprächtigs Summerwätter! Unglaublich! Über 50 Mannschafte, wo sich zum Teil üsserscht witzig und originell verkleidet hänn, syn em Läder nochegrennt und hänn Zobe für e Superschtimmig gsorgt im Feschtzält! Mir freue uns scho wieder uf di nägschti Usgoob im 2003...

Di nägschte zwei Afänger hänn probiert, e Bummel z’organisiere, immerhin isch wenigschtens e Bümmeli drus worde. Dr Thierry und dr Mamba hänn uns zwunge, am Fünfi am Morge z’Basel am Bahnhof z’sy – e Frächheit sondergliche! Mir syn denn mit em Zug uf Scuol gfahre und hänn dört dr Inn (das isch so e miese, kalte Dräggsfluss) kenneglernt. Und zwar gründlich! Im Guinessbuech ka me’s nochläse: Mir syn di neue Rekordhalter im Marathon – River – Rafting! Nur will dr Emi sich im Wasser ka bewege wie e Aal, isch är no unter uns und ka uns immer no drvo verzelle, wie ihm, wo är dur d’Schlucht gschpiehlt worde isch, dr Film vo sym Läbe vor sym innere Aug abgloffe isch...Zobe syn mir in eme guete Reschtaurant gsi go ässe und aschliessend hänn mir no biz Scuol unsicher gmacht. Gwüssi Mensche, wo uns drby begägnet syn, wärde sich wahrschinlig no an uns erinnere.

Am Sunntig isch s’Bummel – OK wieder zur Vernunft ko, mir syn gsi go Ritte (uf ächte Rösser) und hänn sälle mächtig d’Schpore gäh! Nochhär syn mir no ins Thermalbad, was eigentlig no so agnähm gsi isch und uns für d’Schtrapaze vom Vordaag wenigschtens e biz entschädigt het. Nach ere fünfschtündige(!!!) Zugfahrt zrugg uf Basel hänn mir au die Mischig us Usflug und Bummel überschtande gha.

Mutation: Nach acht Joor verloht uns unser Gründigsmitglied Werni. Verschiedeni Gründ hänn ihn zu däm Entschluss brocht. Mir verschtöhn das und bedangge uns rächt härzlig für die gleischtete Arbeite in unserer Clique. Gseh wird me sich jo scho no ab und zue und s’isch jo schliesslig numme e klitzeglaini Ufnahmepriefig, wo eme Comeback im Wäg schtoht. Merci vilmol!!!

 

2003

S'Comité hängt in dr Luft! Das het jetzt aifach emol miesse gsait wärde. Unter anderem isch es bi däm Sujet au um ebbis gange, wo uns diräggt bedroffe het: Ain vo uns, sälle, wo fyr d'Schnäggeposcht verantwortlig gsi isch, isch us em Oberwiler Fasnachts-Comité useschpediert worde. In ere fadeschynige Nacht- und Näbel-Aggtion het e glaine Dail vom Comité, dr aint isch e biz e Digge und dr andere het e Sprochfähler, är redet nämmlig Ziridytsch, beschlosse, dass s'Comité kynftig uf d'Dienscht vo däm Fäldschnäggli verzichte mecht. Mit dr Qualität vo dr Schnäggeposcht het das nadyrlig yberhaupt nyt z'due gha (sy isch jo sythär au nid grad unbedingt besser worde…). Die Aggtion het denn au grad no dr Ryggtritt vo eme zwaite Fäldschnäggli bewirggt, sodass syt denn nur no ains im Comité verträtte isch.

In unserem Waage syn mir uf Rittene ghoggt und unseri schwarz-wysse Goschdym hän, no zuesätzlig vo Näbel umhüllt, e ganz e scheens Bild abgäh.

Zwai vo uns, wo in dr Vorberaitig nit voll hän kenne mitmache, syn denn no als Gottträger ufmarschiert und hän dr Fäldschnäggli-Gott vor em Waage dur s'Dorf drait. Zudäm isch au unsere Vordraab wieder mit vo dr Partie gsi.

Au di 4. Uflag vo unsere Schni-, Schna-, Schnitzelbängg isch e volle Erfolg gsi. Sowohl in Oberwil wie au wieder z'Basel. S'erschte Mol het fyr uns dr Thierry Dietlin als Helgemoler g'amtet und me muess also wirgglig sage, dass är uns wohri Kunschtwärgg glieferet het. Am maischte Fraid hän d'Lyt an unserem Las Ketschup-Bangg gha, wo mir voll ain ab-ghabedihohuha't hän.

8. Birsigtaler-Clique-Grümpeli: Me ka sich numme wiederhole: Scheens Wätter, vil Mannschafte, vil Bsuecher im Feschtzält, Super-Schdimmig – was wott me meh? E ganz e härzligs Danggscheen an alli, wo mitgmacht und mitgholfe hän!!! Als bsundere Attraggtion no d'Liveybertragig vom FCB-Match.

Ändlig wieder emol e Bummel! Dr Zini und dr Emi syn am Wärgg gsi und losgange isch's mit eme währschafte Zmorge by unserer Cliquemamme, dr Babsi. Im Aschluss syn mir mit eme Byssli ins Tessin gfahre, wo mir syn e Rundi go fische. Erstunlicherwys het praggtisch jede au ebbis gfange (het's ägscht ziemlig vyl Fisch in däm Taich gha?)… Sälbschtverständlig hän mir die Fisch denn au grad umgleggt, bretlet und gässe.

Denn syn mir wyter uf Bellinzona und im Castello e Apéro go näh und di scheen Ussicht go gniesse. Wo mir denn wieder abe in d'Stadt syn, syn mir grad nomol ykehrt und denn isch's amüsant worde: Ai Fäldschnäggli het sich dur e Gebot vo 100 Frangge drzue loh bringe mit Glaider und us Versehe au em Natel im Sagg in e Brunne z'gumpe und dert drin umme z'robbe. Mir hän sälte so glacht!

Znacht gässe hän mir in Ascona, ybrigens in eme Baizli, wo au dr Bundesrot Couchepin amme isst. Und nach em Znacht isch denn au no e Rundi Ascona unsicher gmacht worde, woby mir an dere Stell  fyr uns bhalte, inwiefärn mir dert s'Nachtläbe gnosse hän…

Nachdäm mir am Sunntig me schlächt als rächt hän kenne usschlofe und wider Erwarte au kain vo uns e Kater gha het, syn mir an e… Wyydeguschtation. Dr Wyy isch guet gsi, laider isch mir dr Namme vo däm Wyyschuppe nymme presänt.

Uf em Haimwäg hän mir denn no in eme gmietlige Grotto e Stop igleggt und uns nomol tychtig d'Ränze vollgschlage, bevor mir denn dur e Gotthard zrugg richtig Basel gfahre syn. Wenn's uf däm Bummel an ebbis nit gmanglet het, denn isch das uf jede Fall s'Ässe und s'Dringge gsi, me ka durchus vo eme kulinarische Höheflug rede!

 

2004

Jubiläum!!! D'Fäldschnäggli syn scho sagehafti 10 Joor alt!!! Das het nadyrlig miesse gfyyrt wärde und isch drum au grad unsers Sujet gsi. S'erscht Mol hän mir unseri Waagevernissage im Duubeschlag duregfiehrt. Stellet Eych das mol vor! Es isch warm gsi!!! E paar syn glaub richtiggehend verschrogge vor luter Wärmi… Dr Waage het voll und ganz us Balleen bestande und isch wunderbar   a z'luege gsi (und sälle het au no e wytere Vordail gha: So schnäll hän mir vorhär no nie e Waage abbaut gha…). Standesgemäss hän mir unser Stammgoschdym montiert und uns e Keenigslarve ufgsetzt. Alles in allem also ganz e gfreuti Sach! Au unsere Vordraab het uns in unserem Jubiläumsjoor nit im Stich gloh und isch ziemlig zahlrich vor unserem Brachtswaage vorus defiliert.

Unsers 5. Joor als Schnitzelbangg hän mir das Mol sage und schreibe z'Achte hoch in Agriff gno! An dr Schnitzelbanggvernissage im Sprützehysli hän mir eso grad knapp no Blatz gha, aber in de andere Lokalitäte isch's zem Dail scho schampar äng worde. D'Lyt hän aber trotzdäm dr Blausch gha, au wenn sy amigs nit alli vo uns gseh hän, will mir so unglaublig vyl gsi syn. Bsunders hervor z'hebe syn sicher unseri zwai längere Bängg, dr aint unseri Version vom Mani Matter sym Zündhölzli und dr ander umterem Motto: S'isch so wyt wäg (vilicht erinnere sich jo no e paar an sälli…).

9. Birsigtaler-Clique-Grympeli: Strahlend scheens Wätter, e Huffe zfriedeni, luschtigi, guet ufgleggti, originell goschdymierti und dringgfraidigi Gescht, dryber us no Indianer, Cowboys, Köch, Häxe, Schlümpf und Ballerinas – was wänn mir me? Zuesätzlig het im Zwaitausigundvier s'erscht Mol e Beachvolleyballturnierli stattgfunde, wo grad uf guete Aklang gstosse isch.

Dr Jubiläumsbummel het uns uf Schbanie und uf Kuba verschlage, doch do drzue weiss dr Zineli nechers…

 

2005

CUBA-R! Will dr Jubiläumsbummel doch relativ vyl Spure und Ydrygg hinterloh het, isch Kuba grad au no unsers Sujet worde. Mir hän zwor kai Waage baut, aber drfyr hän mir vor em Schlüssel (oder wie au immer dä Schuppe dert jetzt haisst…) e Bar, ebbe d'CUBA-R ufgstellt. Die isch mit Palme deggoriert gsi, sodass me sich tatsächlig fascht in Kuba gwähnt het. De kubanische Traditione verpflichtet, syn nadyrlig fascht numme Mojitos yber d'Theke gange. Mir sälber hän uns als haissi, vollbusigi Kubanerinne in traditionelle Trachte verglaidet, syn gschminggt gsi und me het wirgglig praggtisch kai Chance me gha, z'mergge, dass mir aigentlig gar kai Fraue syn… Das verainzelti Fäldschnäggli Ähnligkaite mit Kugelstösserinne us dr DDR selle gha ha, isch e Grycht, wo kainerlai Händ und Fiess het!

Sälbschtverständlig syn mir au im 05 wieder go Schnitzelbanggsinge. Und obwohl's effeggtiv nit so aifach isch, wenn me emol e guets Joor gha het, isch's uns, das rede mir uns zumindescht y, eimol me glunge, unseri Zuelooser zem Lache z'bringe. Unvergässe isch sicher dr Bangg mit em Pabscht und em Holzmichel (welle vo däne läbt jetzt no oder ebbe nymme?) und unsers Lied zer Melodie vo "Alles fahrt Schi", wo by uns denn "Alles isch z'tüür" ghaisse het.

10. Birsigtaler-Clique-Grympeli: Im 2005 isch es au bym Grympeli sowyt gsi: JUBILÄUM! Wär hätt bym erschte Mol dänggt, dass es das Grympeli au 10 Joor speter no git? Und wie's sich fyr e Jubiläumsusgob ghert, isch s'Wätter au das Mol…waiss es ebber…jä, wie ägscht…bisch sicher…aber isch's nit dr Hammer… s'10. Mol in Folg SCHEEN gsi!!! Als Attraggtione het's e Bullriding und dr zuegherig Animator, dr Don Domingo (uuuuuuuuund PLUMPS!) gäh. Am Grympelisamschtig isch denn no e regelrächti Invasion yber d'Byhni gange: zwai verschiedeni Sorte Römer, Pirate, Mönche, Zwärgli und sogar no e paar Jasskarte hän s'Fäld gstyrmt.

Uf em Bummel syn mir wieder ins Usland gange: uf Nizza an dr Côte d'Azur. Organisiert hän dä Schbass d'Mamble und dr Thierry, gfloge syn mir mit Easy Jet (leider nit ganz so gynschtig, wie me vermuete kennt…). In Nizza hän mir uns denn "des bières" und ziemlig vyl Pastis gennt, s'leschtere am Schdrand im Abligg vo eme wunderscheene, romantische Sunneuntergang. Mir hän au no welle mit so eme Tourizygli e Rundi mache, nur het dä Loggifiehrer aifach nit welle abfahre. Zobe syn mir gediege go diniere und im Aschluss no e biz uf d'Gass. Mir erinnere uns an d'Ussag vo eme Bartender im Casino: "Mais pas pour le monsieur là!" und uf jede Fall au an sälle Tyrsteher, wo gmaint het: "Non, non, non, non, non…"

Am Sunntig syn mir uf Monaco und hän em Fyrscht Albi in sym Schlessli e Bsiechli abgstattet. Denn syn mir go luege, was fyr e Cliqueschiffli mir speter emol wänn poschte. Nochhär hän mir uns no zwai drei Sehenswyrdigkaite inezoge (u.a. nadyrlig s'Casino) und syn uf dr Formel 1-Streggi ummeschbaziert. Z'Obe syn mir denn wieder haime gfloge.

Mutation: Nach 10 Joor het uns unsers Gryndigsmitglied Sacha Fey uf die Fasnacht ane verloh. Är het bruefligi Grynd fyr sy Entschluss gältend gmacht. 

 

2006

Anstatt an d'WM uf Oberville – mit däm Sujet hän mir grad drei Fliege uf ai Dätsch z'tot gschlage: Nämmlig dass Oberville syt neyschtem e Stadt isch, dass us em Dennerkreisel dr Dönerkreisel worde isch und d'Usschrittige alässlig em Match Schwiz-Tyrggei. Als tyrggischi Fuessballnati in Originaltriggots verglaidet syn mir mit em Dönerstand uf em Waage dur s'Dorf gfahre und hän, sträng nach tyrggischer Tradition, Ziebele und Knoblauch usegschosse. Uffallend isch gsi, dass sich gwyssi Kinder und au Erwachseni brobiert hän e Vordail z'verschaffe, indäm sy gruefe hän: "Ich au Tyrgg, ich au Tyrgg!" Mir maine jo numme: Was haisst do au…? Au an dere Stell isch z'erwähne: Merci liebe Vordraab!

By de Schnitzelbängg, wo sich definitiv zem Duurbrenner entwigglet hän, syn das Joor d'Sujets Oberville, Fynstaub (huescht, huescht…) und in Basel denn dr Buesse-Blues im MIttelpunggt gstande. Mir derfe stolz verkynde, das sy wiederum loosens- und sehenswärt gsi syn.

11. Birsigtaler-Clique-Grympeli: S'Grympeli isch im Null Säx us noheliggende Grynd ganz im Zaiche vo dr Fuessball-WM in Dytschland gstande. Mir hän s'Ereffnigsspiel und au d'Mätsch am Samschtig uf ere Grosslynwand live yberdrait. D'Deggoration mit divärse Nationalflagge isch sensationell gsi. Dr Petrus isch wieder uf unserer Syte gsi, doch, mir mien's zuegäh, mir hän nit grad e ideals Datum usgwählt gha. Wäge mehrere andere Verastaltige in dr nechere Umgäbig hän mir, die andere Verastaltige ybrigens au, nit sovyl Gescht derfe begriesse wie allewyl. Aber 1 Mol in elf Joor ka so ebbis halt emol bassiere. Drfyr, und das wän mir ganz bsunders betone, hän mir e Super-Tombola mit ächt tolle und attraggtive Bryyse gha!

Schiff ahoi! Offesichtlig zieht's uns in letschter Zyt unbewusst uf Franggrich am Bummel. Unsere Ehrebreesi, dr Tineli, het zämme mit em Kevin und dr Harrchle e vierdäägige Bummel uf zwai Huusschiff uf dr Seine uf d'Bai gstellt (doch halt, s'muess eher d'Sâone gsi sy, will mir syn nit dur Paris gfahre). Was hän mir gmacht uf dene Schiff?

Mir syn gschlageni vier Daag lang aifach numme "gsi".

Jetzt, was muess sich vorschdelle unter "gsi"? Mir syn uf das Franggrich gange und syn dert mit dene zwai Huusboot go ummetuggere. Grob gsait zwai Daag lang d'Saône und ihri Näbekanäl durab und denn zwai Daag lang d'Saône und ihri Näbekanäl wieder duruf. Und während em Umetuggere syn mir uf dene Boot aifach so biz "gsi".

Und zwor syn mir unhaimlich relaxed "gsi". Mir hän di frischi Luft und s'kiehle Bier gnosse und s'isch uns wohl "gsi". Mir hän sälber kocht und sehr guet g'ässe und mir syn zfriede "gsi".

Was uns sehr erschtunt het, isch "gsi", dass es in Franggrich zem Dail kilometerwyt yberhaupt nyt het! Guet, vilicht dr aint oder ander Fischer, wo am Fische "gsi" isch, aber suscht absolut nyt. Mir hän uns miesse froge, wo die Fischer yberhaupt här ko syn…ehrlig gsait, e biz verwirrt syn mir wäg däm scho "gsi".

Als Hailaits gäbt's no folgendi zwai Eraignis z'erwähne: In dr ainte Schleuse (im Ganze syn's sicher yber zwanzig Schleuse "gsi") het s'ainte Fäldschnäggli an dr falsche Schdange zoge und was isch passiert? D'Schleuse isch kaputt "gsi"… S'zwaite Hailait syn aigentlig drei "gsi": E anders Fäldschnäggli isch sagehafti 3 – in Wort: drei – Mol in d'Saône gheit. Wie nit anderscht z'erwarte, isch das Fäldschnäggli drei Mol ziemlig nass "gsi"…

Obwohl mir uf dene Boot jo vor allem "gsi" syn, syn die vier Daag denn irgendwenn doch wieder verby "gsi". Mir syn wieder am Usgangspunggt zrugg "gsi" und nach dr Autofahrt uf Oberwil isch au dä Bummel wieder Gschicht "gsi". S'isch e scheene Bummel "gsi"!

Mutation: Dr Werni git e Comeback, jedoch ohni e Ufnahmebriefig gmacht z'ha! E absolut unhaltbare Zuestand! Mir wärde uns drum kymmere… 

 

2007

Rauchverbot In Oberwil – also nai! Das hän mir jo wohl miesse als Sujet näh. Ummegloffe syn mir (bis Znacht am Zwelfi ybrigens) als Marlboro-Zigarettepäggli. Das isch aigentlig no ganz bequäm gsi. Verdailt hän mir Kaugummizigis und Flyers. Nach em Cortége hän mir vor dr Gmeini d'Smoking Bar betriebe. Falls es niemerem ufgfalle isch: S'het nur e extrem glaini Nichtraucherzone gha!

D'Schnitzelbängg syn schbeziell z'Basel sensationell toll gsi zem Singe (hoffentlig au zem Loose) und mit unserem FCB-Liedli zer Melodie vo "Mein kleiner grüner Kaktus" syn mir sogar im Querschnitt vom Telebasel ko. Mir finde das super und syn jetzt scho wieder motiviert fyr s'nägschte Joor.

S'Grympeli, wo das Joor am 01. und 02. Juni 2007 uf em Isweiher z'Oberwil stattgfunde het, isch zwor usnahmswys nit vo Hitz und eitlem Sunneschyn beglyggt worde, aber trotzdäm e suberi Sach gsi. S'hän sagehafti 57 (in Wort: Siebenefuffzig!) Teams (Fritig, Samschtig und Beach) mitgmacht. Merci an alli, wo drby gsi syn!!! Und au Merci vil Mol an alli, wo mitgholfe hän!!!

Uf em Bummel syn mir vom 20. bis am 22. Juli gsi, und zwor… in Öschtrich am letschte Alpenair vo de Zillertaler Schürzenjäger. S'OK muess igestoh, dass d'Fahrt e bizeli lang gange isch, jedoch isch's drfyr yberhaupt nit langwilig gsi. S'Bier, wo aigentlig ziemlig grosszygig bemässe gsi isch, isch ämmel by unserer Akunft in Aschau nymme vorhande gsi (me ka sich vorstelle, dass mir mit dr ainte oder andere Pisspause weniger mindeschtens e Stund friehner akoh wäre). Am Fritigobe syn mir denn in Mayrhofen nach eme Apéro digg go Znacht ässe und hän drzue supertyyre, edle Wyy kredänzt. Laider het dr edli Spänder sälber am Wenigschte drvo gha und het sich gli druf abe richtig Näscht verabschiedet. Uf em Wäg dert ane het sälle no ebbis in e Gebysch gworfe und drzue rächt komischi Grysch vo sich gäh und au no die Mayrhof'sche Stroosse vermässe. Dr Räscht vo unserer Bandi isch nach em Ässe ab in d'Schlüsselalm, wo no mächtig dr Bär gsteppt het – so fescht, dass dr Bsuech in dr "Erlebnissennerei" het miesse abgsait wärde…

Am Samschtig het's OK e wunderprächtige Trip uf s'Ahorn organisiert gha, wo aber ziemlig aigewillig interpretiert worde isch. Schlussändlig syn denn aber trotzdäm alli mit dere wältgreeschte Gondle vo dr "Ahornbahn" dert obe ydroffe. Es syn mehreri Kännli yber d'Theke, s'isch uns e altbekannte Landsmaa vom Vorobe ko sensationell luschtigi Witz verzelle und au e gwysses Muul het sym Namme alli Ehr gmacht. Di bescht Attraggtion isch aber e Servierdyyse gsi, wo uns unter andere Umständ wohrschinlig weniger ufgfalle wär… Nit z'vergässe nadyrlig no die zwai professionelle Winggerinne us Japan, wo definitiv alles gäh hän.

Im Aschluss syn mir denn ans letschte Konzärt vo de Zillertaler Schürzenjäger (mir syn ybrigens au in friehnere Joor scho an däm Alass gsi und hän dert unvergässligi Stunde verbrocht). Aber, und das muess an dere Stell in aller Dytligkait gsait sy, das Konzärt isch e Katastrophe gsi. S'schlächtschte, wo sie je gmacht hän. Dr Räscht vom Obe hän mir nach em obligate 10km-Marsch vom Feschtgländ uf em Finkenberg ins Dorf wiederum in dr Schlüsselalm usklinge loh.

Und am Sunntig hän mir denn dr langi Haiwäg unter dr Räder gno… Wo mir wieder zrugg in Oberwil gsi syn, isch s'OK fyr die tolli Organisation vo däm Super-Bummel vo alle Syte beglyggwynscht und mit Lob yberhyft worde (die aint oder ander kritisch Amerggig het's aber au gäh – das sell an dere Stell nit verschwiege wärde…).

Unterdesse het scho d'Vorbereitig fyr d'Fasnacht Zwaitausigundacht, wo jo bekanntlig gottsjämmerlig frieh isch, agfange. S'Sujet isch bestimmt, die erscht Schnitzelbanggsitzig het au scho stattgfunde. Mir syn gspannt, wie's wytergoht… und vor allem, wie's denn schlussändlig usekunnt…

 

2008

Mir lege zum Läse – in Oberwil git’s kai Eierläse me, drfyr git’s, zumindescht an dere Fasnacht, e baar Hiehner me. Uf unserem Waage, wo e grosses Näscht gsi isch, syn d’Hiehner uf em Stängeli gsässe und hän umenand gaggeret. Mir hän au em ainte oder andere e Ei gleggt und vornedruff syn sogar no zwai Bibbeli gsi.  Mir hän usserdäm au e baar gleggt (Eier, Passante, Wirte, Humpe Heeber, aber kai Pizzas), aber ob sälli das hän (uf-)läse könne oder (uf-)gläse worde syn, entzieht sich unserer Kenntnis.

D’Schnitzelbängg, wo ganz im Zaiche vo de Scheefli gstande syn, syn uf guete Aklang gstosse, sowohl im Schnäggedorf wie au in dr City of Basliea.  Obwohl d’Fasnacht eso unaständig frieh gsi isch, hän mir doch e baar glatti Bänggli brynzlet gha. Mir hoffe wyterhin, s’gieng so wyter und dass mir au in de nägschte Joor nit usbuht und mit fuule Eier beworfe wärde.

Unterdesse wüsse mir, dass am 30./31.Mai 2008 s’letschte Birsigtaler-Cliquegrümpeli stattgfunde het. Wenn me uf www.cliquegruempeli.ch so die Föteli vom 08, aber au us de vorhärige Joor aluegt, ka me scho rächt wehmietig wärde.

Im 08 isch’s eigentlig gsi wie immer, usser dass uns jetzt im Nochhinein klar isch, dass es das in däm Rahme in Oberwil wohrschinlig nie me wird gäh – SCHAD!

S’OK het sich in synere Merhhait nymme kenne motiviere, s’BCG wyter z’fiehre und, was ybrigens au sehr schad, aber irgendwie nit erstunlig isch, s’git offesichtlig au niemert, wo d’Organisation vo eme Cliquegrümpeli wott ybernäh. Irgendwo e biz, oder au mit eme aständige Ufwand go mitmache, liggt grad no dinne, aber sälber ebbis uf d’Bai stelle, wänn oder kenne schynbar di Wenigschte… Sotte mir uns do tüsche, kennet Ihr Eych sälbschtverständlig by uns mälde…

Uf em Bummel het’s uns das Mol uf Berlin verschlage, wo mir e biz an dr Gschicht vom letschte Joorhundert gschnupperet hän. Alexanderturm, Muure, Reichtstag, Brandeburgertor, Dölfidänggmol, etc. – in Rikschas und uf em Velo, zum Glygg isch Berlin eso flach, hän mir ziemlig di ganz Stadt abklapperet. Sälbschtverständlig isch au s’Nachtläbe nit z’kurz ko.

Und dr absoluti Höhepunggt, nach eme gmietlige Dinner diräggt an dr Spree (me het aifach e „biz“ lang uf s’Ässe miesse warte) isch denn dr Schuppe vom Schosi gsi, wo mir uns fascht alli, wie magnetisch azoge, zu spöterer Stund wieder droffe hän. Vor eme dezänte musikalische Hintergrund (Ich will…) hän au d’Bilder uf de Bildschirm zu unserer Unterhaltig bytrait. Und au an (oder uf?) dr Bar isch ziemlig ebbis los gsi…

 

2009

Ohni Sujet (das isch jetzt e Wingg mit em Zuunpfahl an d’Waagebauabtailig) syn mir mit unsere aigene oder usglehnte härzige Kids mit glaine härzige Wägeli und härzig glaine Mänge Wurfmaterial am Cortège in Oberwil drby gsi. S’hän uns alli härzig gfunde, mir hän uns au härzig gfunde, d’Kids syn härzig gsi und drum hätt unser Sujet aigentlig „härzig“ sotte sy… Nach em Umzug isch’s denn abgange in dr Schnäggekällerbar vo de Fäldschnäggli, wo me zytewyys ohni schlächts Gwysse hätt kenne Platzangscht beko. Dr Alkohol isch gflosse, d’Musik isch lut gsi und dr eint oder di ander syn sich necher ko…

In unsere Bängg hän mir uns im 09 bevorzugt mit Politigger beschäftigt. Dr Steibrügg het e Schnaizli beko, dr Muurer sy Fett wäg und dr Sämi Schmid e wohri Hommage. Ob am Schalanderli, z’Oberwil oder in de Basler Cliquekäller, het me offesichtlig dr Blausch gha an unsere Schnitzelbängg.

Birsigtaler-Cliquegrümpeli: Kasch bym 08 go luege!

Vom 05.-08. Novämber 09 syn mir uf e Bummel gange: nach MALLORCA!!! Agfange het di ganzi Sach mit eme währschafte, traumatische Schoggerläbnis – mir syn uf Ziri chauffiert worde (Merci Däni) und denn – aigentlig hän mir zwor gsait, mir bhalte das fyr uns – denn – me sott s’Bummel-OK foltere drfyr – denn - lägg isch uns das pynlig - denn hän mir in Ziri e Stadtfiehrig miesse yber uns ergoh loh. Ummegfiehrt worde syn mir vo ere Dame, wo – wie kennt’s anderscht sy – e ziemlig ybels Ziridytsch gschnurt het. Aber guet gmaint het sälli's jo scho...

Wo mir die Tortur yberstande gha hän, het’s in ere Pizzeria, wo offesichtlig halb Ziri goht go Pizza ässe, e Pizza gäh zum Zmittag. Empfange hän uns unseri verdiente ehemolige Cliquemitglieder dr Böde (unterdesse au bekannt als lebändigi Molekularkochlegände) und dr Däge (scho immer bekannt als Äh – Äh – Äh – Äh-Lacher oder in gwysse Kreise au als Dollar/Yen). Will’s dert denn e biz z’lang gange isch, syn mir im Aschluss nit ohni e gwyssi Heggtigg (uf wellem Gleis fahrt dr Zug – nai, das isch dr falsch – mir hän no 2 Minute – und so) zem Flughafe gange.

Nach eme agnähme Flug mit numme mittelschwere Turbulänze syn mir z’Mallorca glandet und hän uns alli zämme vo eme Büssli zu de Mietauti loh transferiere. Dr Mleibäl allerdings isch vorhär nomol kurz zem Flugi zrugggschbrintet, will är dert syni Duty Free-Ykäuf het lo ligge. Syn aigentlig alli im Büssli gsi? Nit ganz alli: S’Märli hän mir grad logger am Flugblatz vergässe. Immerhin het’s denn bald emol ebber gmerggt und so syn mir sälle denn no go hole. Dr Wäg uf Palma hän d’Chauffeure ziemlig zaggig gfunde, was me vom Hotel nit unbedingt ka behaupte. S’isch ämmel relativ lang gange, bis s’OK realisiert het, dass unser Hotel sich zwor an dr Adrässe, wo buecht worde isch, befindet, dass aber s’Blänli im Internet d’Lag vo däm Hotel nit allzu genau beschriebe het. S’Hotel isch nämmlig nit vollzentral und zmizt im Kueche, sondern ca. 10 min (mit eme Auti oder Taxi notabene) usserhalb vom Kueche gläge. Jä nu, mir syn jo flexibel. Mir hän’s also doch no gfunde und, das muess me sage, s’isch e scheens Hotel gsi mit bequäme Better, was aber nit alli glych usgnytzt hän...

Nach eme kurze „Frisch-mache, pudere und schmingge“ hän mir uns (mit 2 Taxi – s’Hotel isch jo nit so zentral gläge gsi) uf e Wäg zem Nachtässe gmacht. Unsers Glygg isch gsi, dass aine vo uns, nenne mir sälle an dere Stell emol Zineli, nit s’erscht Mol uf Mallorca gsi isch und sich drum beschtens uskennt het. Uf syni Empfählig ane syn mir in e absolut typischs mallorquinischs Restaurant gange und hän dert di zwaitbescht Mohlzyt uf em ganze Bummel ygnoh. Warum usser uns allerdings fascht niemert suscht no die Beiz bsuecht het (v.a kaini Yhaimische), isch uns bis hyt e Rätsel blibe und het sicher nyt mit dr Qualität vom Ässe z’due gha... Als Höhepunggt isch uns no d’Botschaft yberbrocht worde, dass mir als Clique insgesamt nit 7 Maitli und 3 Buebe, sondern 7 Maitli und 4 Buebe hän. S’hän sich alli sehr gfreut!

Wytergange isch dr Obe nochhär in eme In-Schuppe in Palma, wo El Garrito haisst, dr aint oder ander isch au no e Huus wyter, z.B. go Karaoke-Singe, und schlussändlig hän alli dr Ruggwäg zem Hotel wieder gfunde (mit em Taxi – s’Hotel isch jo nit so zentral gläge gsi).

Am nägschte Morge syn mir nach eme usgiebige Zmorge (Kaffi, Cola (light), komischi Breetli) mit de Auti richtig Ballermaa abdyst (nai, um die Zyt nonig go Alggoholitäte dringge!). Zwor hän mir au das Mol dr Zielort nit grad uf Ahieb gfunde, aber mir wän jo do jetzt nit kritisch sy... Und was het uns ägscht am Zielort erwartet? SEGWAYS!!! (wär nit waiss, was das isch, soll’s google) Mit dene interessante Gfährt syn mir e relativ langi Rundi am Strand entlang brätteret und hän dr Rieseblausch dra gha. Di maischte vo uns wurde gärn au do sone Segway ha, z.B zum Ykaufe, Boscht-hole oder fyr suschtigi glaineri Usfährtli.

Wo mir wieder zrugg gsi syn, hän mir zur „Feier des Tages“ e Bierli und e 2cl HIERBA (= mallorquinischs Nationalgedrängg - irgend sone Krüter-Likör-Schnaps) drungge und syn nochhär retour ins Hotel, uns vo de Strapaze vo däm Nomidaag go erhole (chille auf neydytsch). Vor em Usgang hän mir mit greeschter Begaischterig „Looping Louie“ gspielt. Dr Usgang het uns nit ins Oberbayern (das isch scho im Winterschlof gsi), sondern in Bierkeenig (Bierkönig) gfiehrt. An dere Stell no e Randbemerggig: Novämber isch di ideali Reisezyt zem uf Mallorca z’goh! S’isch zwor praggtisch alles zue und s'isch au nymme so warm und s'schifft immer wieder zwyschedure, aber s’het defintiv nit allzu vyl Schwobe im Novämber!!! (drfyr isch me e beliebts Opfer vo de Nääscher, wo aim irgendwelche Saich wänn adraihe, aber s’het halt alles syni Vor- und Nochdail, und v.a. het’s vermuetlig, wenn’s in andere Jooreszyte me Schwobe het, ziemlig sicher au no me Nääscher...) Im Bierkeenig hän mir denn 2-3 Bierli und drzue no e HIERBA drungge und e glainers Feschtli gha, bevor mir uns, zem Dail uf Umwäg, wieder uf e Haiwäg gmacht hän (mit em Taxi – s’Hotel isch jo nit so zentral gläge gsi).

Am Samschtig hän mir nomol das usgiebige Zmorge vom Vordaag gnosse und syn nochhär mit de Mietauti d’Cuevas del Drach go besichtige, das syn wunderscheeni Dropfstaiheelene im Inselinnere. Uf em Heelebode unde hän mir denn no e interessante Vordraag derfe aloose, bevor mir uns di staili Stäge wieder durufgschleppt hän. Us dr Heeli use kunnt me am Beschte by feet oder au by baut...

D'Cuevas del Drach syn ybrigens dr Geburtsort vo eme gwysse Inschpäggter Derry Camembert, wo dert in dr dunggle Heeli nit s'Liecht, sondern d'Dunggelhait vo dr Wält erbliggt het. Ufzoge worde isch är vo Wölf und wenn me dr Legände darf Glaube schängge, het är mit 14 s'erschte Mol Daagesliecht gseh. Dr Derry het sich im Sälbschtstudium zem Maischterdetektiv usbildet und isch unterdesse e anerkannte und allersyts gschätzte Ermittler worde. Sys Marggezaiche isch dr brun-violetti Schal, wo är, wenn är mit dr Vespa drvobraust, immer sehr elegant yber d'Schultere wirft. D'Fäll, wo ihm vertrauensvoll avertraut wärde, leest är immer im Schlof, wenn är nach eme aschdrängende Daag im Bus oder im Drämmli yniggt und's ihn denn so richtig scheen dureschyttlet. Woby är syni Fäll aigentlig ebbe gar nie leest, sondern hegschtens unbewusst mithilft, dass ebber anderscht e Leesig findet. Dr Inschpäggter Derry Camembert het in synere ganze Karriere no kai ainzige Fall gleest, was e wyters Marggezaiche vo ihm isch und so ainiges zer Legändebildig bidrait het.

Nach ere glaine Stärggig hän mir uns uf e Haiwäg gmacht. Zobe syn mir in Palma go Znacht ässe (Chimichuri) und nochhär hän di ainte dr Schlof vo de Gerächte gnosse, während die andere nomol e bizeli uf Putz ghaue hän. (ins Hotel zrugg syn alli mit em Taxi – s’isch jo nit so zentral gläge gsi).

Am Sunntig isch aimol me s'usgiebige Zmorge uf em Brogramm gschdande und denn syn mir uf Alcudia go Quad fahre (wär nit waiss, was das isch, soll's google). S'Wätter het voll mitgmacht (kalt und rägnerisch) und so hän mir grosse Schbass dra gha. Wie Rennfahrer syn mir mit max. 30 km/h dur d'Gegend tuggeret. Nach eme glaine Imbiss (s'het nur dr Derry zuegriffe und erscht no nit ufgässe!) syn mir go d'Mietauti zrugggäh und aschliessend wieder an Flughafe, wo's fyr ai Schnäggli no e deftigi Yberraschig gäh het. Jetzt isch au dr Momänt ko, wo mir di beschti Mohlzyt uf däm Bummel bikoh hän: Mir syn no kurz in Burger King! Dr Flug isch im Flug vrbygange, d'Zugfahrt vo Ziri uf Basel isch laider nit so zygig umme gsi, und so syn mir also gege Mitternacht zfriede wieder haimekoh. Alles in allem isch's e super Sach gsi und mir sage em OK (fyr dr Stadtbummel in Ziri git's no baar hinter d'Leffel) härzlige Dangg!

 

2010

Stellet Eych vor, mir hän die Fasnacht wieder e Sujet gha!!! Und zwor het das "Mir draage's z'Grab" ghaisse. Z'Grab drait hän mir e Minarettli in eme schwarze Sarg, wo ohni z'ybertriebe mindeschtens 2 Tonne schwer gsi isch. Offesichtlig het me's im Vorfäld mit de Lypfbrobe nit allzu genau gno... Kurz vor em allgemaine Zämmebruch hän mir das Requisit, nachdäm mir immerhin ainehalb Umzugsrunde gschafft gha hän, bym Milchhysli anegschdellt und erlichteret ufg'atmet. S'Minarett isch in Handarbeit demontiert worde und dr Sarg isch me oder weniger uf diräggtem Wäg in di nägschti Mulde gwanderet. S'Minarett het uns denn fyr e Räscht vom Obe (in Bäre (Schigge), in Ochse und in d'Wehrlinhalle) beglaitet. D'Schmärze an de Schultere und au suscht em ganze Keerper hän ys ybrigens no ainiges länger beglaitet.

D'Schnitzelbängg Zwaitausigundzäh syn e guete Joorgang gsi. Ghaddafi, Merz und Schwoobe - was will me me? Z'Oberwil hän mir unser gwohnts Baizetyyrli gmacht (no e diggs Merci ans Ambiente-Publikum, wo super mitgmacht het und s'Gegedail ans Ochsepublikum => wo isch denn im Ochse die gueti Schdimmig us de letschte Joor anekoh?), denn isch s'Schalanderli ko (e suuberi Sach) und nochhär syn mir wyter an d'Basler Fasnacht. Dert syn mir am Mäntig dur d'Cliquekäller zooge, am Zyschdig hän mir an dr 7. und letschte Usgoob vom Schnaabelbryys dailgnoh und am Mittwuch isch nomol e Rundi Cliquekäller agsait gsi. Alles in allem e grandiosi Aglägehait!

Doch am Mittwuch isch au no ebbis anders gsi: D'Bryysverleihig vom Schnaabelbryys. Und wäreli wär het ägscht dr 1. Blatz bikoh? Also e biz stolz uf uns syn mir also scho. Aber mached Eych kai Sorge: Mir hän ys fescht vorgnoh, dass mir drotzdäm mit baide Bai uf em Bode bliibe und mir wärde ys fyr s'nägscht Joor denn äxtra vyl Mieh gäh, dass mir wieder mit aschdändige Bängg kenne ufwarte.

So, fyr e Momänt isch unseri Cliquegschicht wieder emol topaggduell. Wytergoh duet's an dere Schdell allefalls mit News vo dr Lämpesitzig (das glaubt dr Chronischt zwor eher nit) oder mit Infos zem "Em Bebbi sy Jazz", wo mir das Joor am Rümelinsblatz fyr d'Gschänggliboutique e Schdand derfe mache. Und eventuell, aber au das kenne mir nit verschbräche, publiziere mir uf unserer Homepage by Glägehait dr allererschti Fall vom Inschpäggter Derry Camembert, wo sälle sälbschtverschdändlig bis hyt nit het leese kenne...

Also unsere Schdand am Alass „Em Bebbi sy Jazz“, wo mir fyr d’Gschänggli-Butygg hän derfe betryybe, isch e ganz e gueti Sach gsi. Mir hän wirgglig nit grad wenig ykauft und syn trotzdäm vellig usgschosse gsi am Schluss! Mir hän sogar no im Glaibasel miesse drei Not-Fässli Ueli Bier go uffdryybe... E härzligs Danggscheen drum an sälli, wo die saumässig schwere Not-Fässli Ueli Bier gholt hän, an Lukas und Liliane Wagner, wo uns dä Schdand ermeegligt hän und nadyrlig au härzlige Dangg an alli Gäscht, wo by uns ebbis drungge oder g’ässe hän. Mir wärde au nägscht Joor wieder mit Mojitos, Ueli Bier und em Bebbi-Risotto am Bebbi sym Jazz presänt sy!

Laider isch dr erschti Fall vom Inschpäggter Derry Camembert nonig zu Papier brocht worde, Ihr miend Eych also no e bizeli gedulde...gleest worde isch är ybrigens nadyrlig au no nit...

Dr Bummel 2010 het uns ins Ämmital uf Langnau in d’ Aemme Brauerei gfiehrt. Dert hän mir mit em Aschi zämme e Bierli braut und no vor em Zmittag e baar Bierli deguschtiert. Nach em Zmittag syn mir denn ganz in dr Neechi by dr Hornussergsellschaft Langnau-Berge go Hornusse. S’isch also gar nit so aifach, die Nuss ainigermasse wyt ewäg z’befeerdere. Schlussändlig isch’s aber de maischte vo uns doch glyggt, e ziemlig scheene Nuss-Schuss z’mache. Numme by aim Fäldschnäggli het sich d’Wyti im Santimeterberyych bewegt... ob’s ägscht an synere Nussallergie gläge isch? D’Hauptattraggtion isch dert aber nit s’Hornusse, sondern e Live-Performance vo dr Monika Kälin gsi. Mit ihre Wälthits „Mir mache Stimmig“ und „Rambazamba“ het sie uns yber alli Masse kenne begaischtere!!!

Im Aschluss syn mir denn uf Sumiswald (das Kaff het gfyylti 53 Ywohner) gfahre, wo no e Rundi Pfyylbogeschiesse uf em Brogramm gstande isch. Me glaubt’s kuum, aber sälle vo uns, wo bis jetzt mit Rieseabschdand am maischte Zyt im Militär verbrocht het, het mit eme Rieseabschdand am wenigschte droffe... Nochhär hän mir am glyche Ort derfe unseri 6-Maa-Luxusmasseschläg ohni fliessends Wasser, ohni Toilette und ohni Fänschter bezieh, was nit by alle dr glych guet Aklang gfunde het („Mit 18 wär das jo no ok gsi, aber sicher nymme mit 35! Fyr was gang ich denn jede Daag in dr Wuche go schaffe?!?!??!! Fluech! Motz! Jammer!!!“)... S’Nachtässe am glyche Ort, s’het sich do ybrigens ums „Forum Sumiswald“ ghandlet, isch sehr exquisit gsi, v.a. s’Pouletbryschtli e wohrs Wunder vo dr Kochkunscht. Wytergange isch’s uf dr Schbortkegelbahn, wo ai Fäldschnäggli dur absolut krassi Unfairness ufgfalle isch... suscht wär’s nämmlig aigentlyg no e glatti Sach gsi.

Nach eme kurze Zwyschestopp in dr ainzige Baiz, wo ainigermasse in Rychwyti gsi isch (30 Minute Fuessmarsch!), syn mir mangels Alternative mit eme Taxi uf Burgdorf, wo mir dr Obe denn no hän usklinge loh.

Nach ere eher kurze Nacht syn mir am Samschtigmorge frieh wieder ins 3-Linde-Mobil ygstiege und kurz drufabe am nägschte Ziel ydroffe: Uf eme Buurehof, wo mir mehr yber d’Käshärschdellig hän derfe erfahre. Dert het’s au no ebbis Zmittag gäh, wo mir – und das isch e ganz e bsunderi Attraggtion gsi – zmizt ineme Fliegeschwarm (die hän dert wohrschinlig grad ihres Jooresdräffe abghalte) hän derfe gniesse. Zum Dessert het’s fyr alli e „Föck the Hörst“ gäh, das isch e Kugele Holundersorbet mit Holundersirup ineme Glas (e „Föck the crazy Hörst“ isch ybrigens genau glych, numme het’s dert denn no Wodka dinne). S’Bsundere am „Föck the Hörst“ isch, dass me sälle ohni Diskussion ka zrugggäh, wenn er nit e Original isch. Mir maine, wo git’s so ebbis no hytzudaags? Wo mir denn wyterzoge syn, hän mir grad no e paar Fliege mitgnoh ins Byssli...sälli haige grad in di glych Richtig miesse...

Unsere Wäg het ys uf Konolfinge ins Parkhotel Schloss Hünigen gfiehrt, wo’s nach eme Apéro im Rosarium (da’sch sone Rosegarte mit e Huffe Roseblueme) e ruhigi Ruhephase im Zimmer gäh het. E paar syn no e biz go sauniere, e paar numme fuul ummegläge, während di andere logger dr Apéro verlängeret hän... Nochhär het’s e feyns Nachtässe gäh (guet, aim het’s nit so passt, aber by sällem isch das aigentlig normal) und wäreliwär het ys no e Yberraschigsbsiechli gmacht...? S’ehemolige Fäldschnäggli mit em markante „Äh-äh-äh-Lache“. S’Servierpersonal het sälle sicher immer no in beschter Erinnerig! Nach em Znacht syn e paar no uf Bärn ane sogenannti Ofeparty, während di andere dr Obe im Hotel gmietlig beändet hän.

Am Sunntig het’s Zmorge gäh, nomol e Rundi Wellness und vor dr Ruggfahrt nomol e Abschiedsapéro im Rosarium. Im 3-Linde- Byssli het’s gly drufabe no e baar Mol zischt und z’Oberwil im Pub hän mir ys zu gueter Letscht dr Match YB-Basel ynezoge. Nach em Match syn alli erhohlt und zfriede haimegange...

Und wiederum wär dodrmit unseri Cliquegschicht extrem topaggduell und uf em absolut neyschte Schdand. D’Zyt vo de Fasnachtsvorberaitige ruggt langsam necher und vermuetlig wird’s denn do au mit Tatsache und Faggte yber di nägschti Fasnacht wytergoh.

 

2011

Unter em Sujet „Bauzirkus Oberwil“, will’s yberall im Dorf vo Baustelle numme so gwimmlet het, syn mir mit eme Waage, wo als Mischig us Zirkuszält und Märtstand drhär ko isch, am Oberwiler Umzug drby gsi. Wie in andere Zirkusmaneesche au, het’s am Bode Sagmähl gha. Verglaidet hän mir ys als Gleen, mit ere Sprytzblueme am Revers und richtige grosse Gloonschueh! Und wie’s sich fyr richtigi Gleen gheert, isch an däm Sunntig au s’Lache nit z’kurz ko (usser im Ochse, wo’s laider aimol me gwyssi Ungraimthaite gäh het bym Nachtässe). Aber was soll’s... Unsers Unwäse triibe hän mir, wie jedes Joor aigentlig (wo wott me sunscht au ane...), im Bäre, in dr Turnhalle, im Humpe Heeber-Waage und im Schnäggekäller.

Schad, hän nit alli, wo mit vyl Elan in d’Vorberaitig gstartet syn, denn effeggtiv au kenne an dr Fasnacht mitmache. Au e vylversprächends Comebägg het laider miesse uf unbestimmti Zyt verschobe wärde...

Drmit’s nit vergässe goht, do wieder emol e Ufzählig, wär so drby gsi isch:

Bräme, Döggi, Zini, Harrchle, Märli, Werni, Mamba, Derry, AAL. Pausiert het dr Mleibäl.

Im 2011 hän mir e wyters Mol Bängg uf guetem Niveau produziert. Unvergässe bliibe dr Ilauf mit em Vuvuzela-Getröte, dr ewig Epiney und sicher au, dass mir ai Bangg mit Frauestimme gsunge hän.

Dr Bummel 2011 het im Schwoobeland stattgfunde (s’isch aifach gynschtiger dert) und isch vo A-Z brilliant organisiert und duuredänggt gsi (als Bispiel syn mir kai Meter gloffe, wo nit zwingend neetig gsi wär). Nach em Ambiente-Apéro syn mir mit em falsche Zug uf Karlsruhe gfahre und dert grad emol dr nägscht Apéro, bzw. e Lunchli im „Am Tiergarten“ go näh. Nach eme kurze Zwyschestopp im Hotel isch di gross Attraggtion „Beer-Bike“ an dr Raihe gsi. An de Pedale d’Fäldschnäggli und am Styyr dr Jens-Dieter Äppelwoi. Mir hätte nit dänggt, dass dr Ysatz vo sooo vyl Musggelkraft notwändig isch, zum das Ding zem Fahre z’bringe... Immerhin het’s e Zapfhahne gha! S’Znacht in dr Cantina Majolika isch exquisit und au dr Räscht vom Obe doch sehr unterhaltsam gsi. Mir hän welle ebbis erläbe, vor allem aine, und hän das denn in d’Tat umgsetzt.

Am Samschtig isch nach eme Boxestopp im Oxford Café e Stadtfiehrig uf em Brogramm gstande – also s’isch scho e scheeni Stadt, das Karlsruhe. Go Znachtässe syn mir in dr Brauerei und will’s gar nit so kalt gsi isch, syn mir nochhär no e biz in e Gartenbaiz gsässe. Dert syn sehr interessanti Frogestellige diskutiert und spannendi Blän fyr dr räschtlig Obe gschmiedet worde. Also syn mir no e Huus wyter...

Im Europabad, wo mir denn am Sunntig  no anegange syn, hän alli usserordentlig dr Blausch gha, drotz e biz vyl blutte Schwoobe im Saunaberich...

 

2012

An dere Fasnacht hän mir ys wieder emol e Uszyt gennt, was s’Waagebaue betrifft, und drfyr im Bäre (Schiggi) im 1. Stogg d’Bar gschmisse – notabene unter Motto: Bäre-Bar. Nach eme loggere Uftaggt am Schmutzige Donnschtig isch am Fasnachtssunntig denn d’Boscht abgange. Usser em Bäre hän mir drum nit allzu vyl gseh vo dr Fasnacht. Immerhin hän mir ys in Grüppli sowohl am Nomidaag während em Umzug wie au am Obe no e biz kenne unters Volk mische. Also ka sicher niemerts sage, d’Fäldschnäggli sige nit umme gsi!

D’Bängg syn im 2012 us unserer Sicht e glungeni Usgob gsi und mir hän e mächtig dicht drängte Terminkaländer gha. Gehn mir also emol chronologisch vor:

Fritig: GOSCHE-Vernissage im APH Drei Linde (z’Dritt) – Prädikat: sosolala
Samschtig: Fasnachtsglöggli (z’Dritt) – volli Wehrlinhalle – Prädikat: suberi Sach!
Zyschtig: Oberwiler Baize (z’Viert): Prädikat: Gold – im Ochse het’s wieder e tolls Publikum gha, wie ybrigens au in alle andere Spielstätte. S’ainzig Unerfreulige isch und blibt d’Guggemuusig im Pöschtli. Laider isch au dr „Lätti-Schöttl“ nymme umme gsi...
Fritig: Schalanderli (z’Viert): Prädikat – Immer wieder vollgail!
Mäntig, Zyschtig & Mittwuch Basel (z’Viert): Prädikat: Gold mit Zuesatzzahl!
Fritig: Schnitzelbangg-Gala Lieschtel (z’Dritt): Prädikat: e würdige Abschluss!

Dr Haupt-Gägg isch unsere lange Bangg zum Thema Merkozy zer Melodie „Der Wein von Mykonos/EAV“ gsi. Zudäm syn das Joor au di klassische Bängg durchs Band vo hocher Qualität gsi, sodass mir jedes Mol vo Neuem d’Qual vo dr Wahl gha hän. D’Marlise het by de Helge wieder ganz gueti Kunscht abglieferet und au dr Helgemooler us de aigene Raihe, wo no drei Kunschtwärgg bygstyyrt het, isch offebar kynschtlerisch begabt.

Wo das Joor im Septämber dr Bummel anegoht, waiss bis jetzt numme s’OK. Sobald’s dr Chronischt au waiss, bzw. wenn dr Bummel denn umme isch, sott’s do aigentlig di nägschte News gäh.

Unseri aggduelle Projäggt syn unsers neye Cliquelokal z’Oberwil, wo no ziemlig vyl Umbauarbet uf uns wartet und d'Gryndig vonere neye Schnitzelbangggsellschaft.Schins sig ebbe neyerdings d'Mitgliedschaft in sonere Gsellschaft d'Vorussetzig drfyr, dass me zem Telebasel darf go singe...

Und was an dere Stell au no wott und muess erwähnt sy, isch unsere riesegrosse Dangg an unseri Gönnerinne und Gönner, wo uns immer treu und grosszygig unterstytze!

So, s’Cliquelokal isch unterdesse scho länger fertig umbaut und s’isch wirklig e Bijou worde!

Und wie versproche goht’s jetzt do mitem Bummel 2012 wyter: Am Bummel 2012, wo uns im Vorfäld vom OK Bräme und Mamba als Triple F-Bummel (was au immer das haisse sott…) schmagghaft gmacht worde isch, simmer uf Dublin gange. Und egal, was das Triple F au ghaisse het, s’isch e ganz e gfreuti Sach gsi! Mir hän uns s’formidable irische Bier lo schmegge, d’Guiness-Brauerei und d’Jameson-Whiskey-Distillerie besichtigt und sogar no e Ghost-Bus-Tour gmacht. Zu dere Tour ka me sage, dass sie nit ganz zem richtige Zytpunggt stattgfunde het, will mir aigentlig grad so scheen idrungge gsi wäre und drum dr kalt Entzug im Bus yberhaupt nit vertrait hän… immerhin hämmer e ächts und wohrhaftigs Gschpängscht gseh…

 

2013

D’Oberwiler-Fasnacht 2013 hämmer denn zem greeschte Dail in dr Schigge verbrocht… aber nit, wie das alli erwarte wurde, vor oder an dr Bar, sondern hinter dr Bar. D’Fäldschnäggli hän im erschte Stogg d’Bäre-Bar bewirtet. S’isch denn halt scho so, dass me vo dr Fasnacht nit sooo vil het, aber au in oder hinter dr Bar isch’s glatt gsi, s’het e Huffe Gäscht gha und e bizeli use an di frisch Luft simmer denn trotzdäm no ko.

Was d‘Bängg bedrifft im 2013, het’s e Novum gäh oder ebbis, wo’s zumindescht scho ziemlig lang nymme gäh het: Mir hän kai Lied, sprich kai lange Bangg gha… drfyr sin unseri „normale“ Bänggli au nit schlächt gsi und perfäggt gsi isch nadyrlig, dass mir zu unserem Streller-Bangg im Basilisgge-Käller e Live-Helge gha hän: dr Marco Streller hegschtperseenlig! Sunscht hätte mir’s denn au no vo Asylante, Vegetarier und eme Kaffi am Pischterand gha… uf Zuesatzufdridd hämmer im 13 verzichtet und sin aifach z’Oberwil, am Schalanderli und an dr Basler Fasnacht unterwägs gsi.

Dr Derry Camembert und dr Huschipfuschi hän fyr uns im 2013 e Bummel in Barcelona organisiert, gwohnt hämmer dert inere Wohnig vo dr Marianne – härzlige Dangg nomol! Was allerdings nit ganz ufgange isch, isch dr Zytblaan… in aller Herrgottsfriehi simmer dehei abgholt worde, ab an Flughafe und ab uf Barcelona. Sowyt so guet… aber ungefähr zwysche Achti und Nyyni am Morge simmer in dr Wohnig akoh und wär isch denn scho wieder uf d’Idee ko, dass me vilicht mol miteme Bierli kennt astosse??? S’isch denn ebbe unerwarteterwiis nit bi däm ainte Bierli bliibe… am Nomidaag hämmer aber trotzdäm no e Usflygli gmacht und sin mitere Sailbahn dert uf dä Barceloneser-Ussichtsbärg. Dert simmer wieder in Gnuss vomene Bierli ko – und zwor isch’s uns im wältgreeschte Plastiggbächer serviert worde, wo gfyylti zwai Liter Bier Blatz gha hän dinne… Zobe het’s am Strand bim Hafe no e ganz e guets Znacht gäh und nochhär hän sich unseri Spure in divärse Quartier vo Barcelona verlore (vo dene Quartier git’s dert no erstunlig vil und laider hän sich nit numme unseri Spure dert verlore…). Irgendwenn sin aber doch alli wieder zrugg gsi in dr Wohnig…

Am 2. Daag sin nit alli glich guet in Form gsi und drum hämmer gruppewiis unterschiedligi Daagesbrogrämmer absolviert, Zobe simmer aber immerhin wieder alli zämme go diniere. Am letschte Daag no Sightseeing mit Tuuribus und FC Barcelona-Stadionbesichtigung. Alles in allem e super Sach – merci drfyr em OK.

 

2014

Wär jetzt do die ganz Cliquegschicht vo Afang a gläse het, sott aigentlig wysse, was jetzt kunnt! D’Fäldschnäggli sin jetzt scho sage und schreibe 20 (in Wort: ZWANZIG) Joor alt – Jubiläum!!! Standesgemäss simmer am Oberwiler Umzug mitere Stretch-Limousine unterwägs gsi und hän’s uns guet goh loh. E biz us dr Limo usewingge, e biz Autigrammkarte verdaile und e biz Schämpis dringge – das isch mol e agnähme Umzug gsi! E Danggscheen no an d’Andrea, wo uns üsserscht souverän dur alli Widrigkaite schauffiert het! Zobe im Ressli go spiise und no biz do ummeghange und dert aine gno. Mir hän (umzugsmässig wohrschinlig s’letscht Mol…) uf jede Fall dr Blausch gha. Unscheen gsi isch, dass mir kurz vor dr Fasnacht no e Mitglied verlore hän, wo sich kurzfrischtig per Mail fyr Fasnacht und Bummel abgmäldet und glichzytig au grad no dr Usdridd gä het… es erybrige sich wyteri Kommentär… wie’s allgemain mit de Fäldschnäggli an dr Oberwiler Fasnacht (also mol abgseh vo de Schnitzelbängg) wytergoht, isch im Momänt au nonig spruchrif…

Dr Schnitzelbangg-Joorgang 2014 (notabene 15-Joor-Jubiläum – au scho!!!) ka me sicher als glunge bezaichne. Mir hän das Joor s’fyr uns sälber schwierigschte und asträngendschte Lied ever im Repertoire gha – dr „Cancion de corruption“ zer Melodie vom Marriachi-Song usem Desperado-Film. Aber im Nochhinain het sich dr Ufwand uf jede Fall glohnt, will uns s’Publikum au entsprächend und sehr asprächend mit vil Applaus entschädigt het. Usserdäm simmer offebar als ainzige wilde Bangg im Kohlmann’s bim Telebasel ufträtte – härzlige Dangg de Verantwortlige! Vilicht no erwähnenswärt isch, dass mir das Joor numme 3 gsi sin, wo gsunge hän und us Personalmangel no e extärne Helgebueb hän miesse organisiere – messi fyre Isatz Steggli! Wie’s mit de Bängg wytergoht, isch ybrigens klar: S’git nägscht Joor wieder…

Jo, und jetzt luege mir emol, was dr Friehlig und dr Summer so bringe und wärde do als Nägschts vo unserem Jubiläumsbummel verzelle, wo Ändi Auguscht wird yber d’Bihni goh…

An unserem Jubiläumsbummel sin mir Bravehearts fyr 10 Daag uf Schottland gange! Das isch also e super Sach gsi, wo dr Harr und dr EMi do organisiert gha hän – au im Nochhinain nomol härzligschte Dangg dodrfyr…! Sunscht no am Start gsi sin d’Bräme, dr Derry, dr Döggi und dr Werni.
Zerscht simmer uf Edinburgh, wo mir näbst e Huffe Pubs, Bars und Konzärtli au s’legendäre Edinburgh Tattoo gseh hän und uns die scheeni und sympathischi Stadt alässlig vonere Stadtfiehrig hän lo necher bringe. Mir hän-ys alli so wunderscheeni Jimmy-Hats poschtet und drmit e extrem gueti Falle gmacht! Vo Edinburgh us simmer denn mit 2 Mietautis (Rächtsgstyyrt notabene!) losgfahre richtig Pitlochry und unterwägs no e Rundi go Panzerfahre. In Pitlochry (wo’s ybrigens z’wältbeschte Haggis git!) hämmer imene Super-Castle-Hotel übernachtet, wo’s doch au no dr eint oder ander edli Whiskey z’kredänze gäh het. Aschliessend isch‘s witer gange richtig Fort Williams oder genauer uf Laggan, wo uns e nätts Huusboot erwartet het. Mit sällem simmer denn via Loch Oich und bi Fort Augustus verbi dur divärsi Schleuse ufs Loch Ness uffe tuckeret, hän dert aber, wie so vili anderi vor uns, s’Nessie laider au nit gseh. Dä Huusboot-Trip, wo ganz im Zaiche vom zuefälligerwiis sehr passende Lied „Loch Ness“ vo Judas Priest gstande isch, isch im Ganze 4 Daag gange, und wieder zrugg in Laggan isch’s denn mitem Mietauti witergange uf Oban. Unterwägs simmer no go Quadfahre und in Oban isch u.a. d’Besichtigung vo dr Oban-Distillery ufem Programm gstande. Di nägscht Destination isch Dunoon gsi, wo mir di wältberiehmte Highland Games, aka Cowal Gathering, sin go bsueche. Lägg, hän sälli dert Baumstämm und Felsbrogge, also aigentlig fascht alles, wo schwär isch und wo me ka ummewärfe, ummegschosse… und zum Schluss simmer denn no Glasgow (wo sich erstunlicherwiis, obwohl aigentlig überall gnueg Bier umme gsi isch, glich dr Spreu vom Waize trennt het… aber das passiert jo längerfrischtig fascht immer…) , bevor mir vo Edinburgh us wieder haime sin.

 

2015

Jä, 2015 simmer jetzt tatsächlig s’erschti Mol sit lange Joore am Oberwiler Umzug nur als Zueschauer am Strosserand gstande. Wobi me muess sage, dass das scho au no sy Raiz het… v.a. wenn me bedänggt, was mir so alles im Vorfäld NIT au no mien mache. Will, s’isch klar, mit de Bängg simmer sälbstverständlig trotzdäm wieder am Start gsi!

Und das Mol hämmer die Bängg au nymme z’Dritt, sondern, man höre und staune, wieder z’Fünft kenne darbiete. In Form vom Sché-Sché und vom Wildi hämmer nämmlig Verstärggig biko! Dr Sché- Sché isch zwor denn grippehalber z’Oberwil usgfalle, het aber immerhin in dr Stadt kenne drfyr sorge, dass mir ebbe z’Fünfte uf dr Gass gsi sin. Näbem obligate Gerry Müller-Bangg und eme Euro-Liedi sin z.B. au „je suis charlie“, d’Spiess-Hegglin und dr Hürlimaa oder s’Basler Fraueli unseri Sujets gsi.

Dr Bummel 2015 het ys ins scheene und lauschige Hamburg gfiehrt. S’OK het das guet organisiert gha, will scho am erschte Obe simmer bletzlig unverhofft in dr bekanntischte Hamburger-Schwulenstrasse gstande und hän erscht no miesse e rosarote Woo-Delight konsumiere… e ganz e siessi Sach… sunscht sin natürlig St. Pauli und Reeperbahn mit Nachtwächterfiehrig und au no anderi „Lokalbesichtigunge“ ufem Programm gstande, s’het Hot Dogs gäh mit dr Schärfistuefe „nich so dolle“, vo de zahlriche sunschtige Attraktione und Verfiehrige wämmer gar nit rede. E Haferundfahrt, do das Riisemodällisebahndingens, e Musical, dr Fischmärt in de friehne Morgestunde (Atemlos durch die Nacht!!!) und aständig vil Gärschtesaft und Fischbreetli hän dä glungeni Usflug abgrundet.

 

2016

Vom disjöhrige Oberwiler-Umzug git’s nit vil z’brichte… mir hän au das Mol wieder zuegluegt…

Vo de Schnitzelbängg git’s hingege scho wieder ebbis z’brichte! Mir sin zwor jetzt das Mol scho wieder nymme 5, sondern numme no 4 gsi, aber hey: Immerhin…! Dr Sché-Sché het nach sim letschtjöhrige Ysatz feschtgstellt, dass sich d’Bängglerei nit wirklig mit sim Amt als Breesi vom Oberwiler Fasnachts-Comité veriibare loht, will dert gnau zer gliche Zyt wie bi uns am Maischte Arbet z’erledige isch… mir verstehn das nadyrlig und finde jo schliesslig au, dass Bangg-Singe bi uns numme mit 100%-Ysatz meeglig isch… und wenn das zytlig nit dinneliggt, isch’s sicher besser eso… aber trotzdäm härzlige Dangg fyr dis Engagement Sché-Sché!
Somit simmer also zu Viert (s’Ur-Trio ergänzt mitere Wildhuudärä) uf dr Gass gsi und hän z’Oberwil z.B. s’laidige Thema Dorfbolizischt thematisiert… und fascht alle Zuelooserinne und Zuelooser wird sicher au no unsere Ega-a-al-Bangg in beschter Erinnerig blibe si... e Pointedichti sondergliche het me derfe lääse…!

Unsere Bummel het-ys im 2016 uf Franggriich uf Bordeaux und Arcachon gfiehrt. Mir sin dert au zu Viert gsi (ohni Wildi, aber mitem Derry) und s’isch also e rächte Schbass gsi! In Bordeaux simmer im Wyy-Museum gsi und nit wyt ewäg vo Bordeaux hämmer im Pomerol e Wyy-Brauerei besichtigt – Château Beauregard het sälli ghaisse und s’het feyni Drepfe z’deguschtiere gäh. Pomerol-Wyy goht ybrigens immer, do kasch nyt flasch mache!
Ybernachtet hämmer im Hôtel de tourny und e exquisits Znacht gässe hämmer im Restaurant Racines, wo mir e delizieese Mehrgänger kredänzt hän – bonne degustation!
Di greescht Addraggtion an sällem Obe isch aber unsere Bummel-OK-Breesi gsi, wo inere Rauchpause vor dr Baiz e Delifon biko het, wo är vom Hotel in Arcachon gfrogt worde isch, wenn hyt Zobe mir denn wurde idräffe… äh was? Hyt? Nai, morn! Nai, hyt! Oh-oh… nacheme schwere Organisationsschübli hän denn aber zem Glygg glich au no Schlofplätzli fyre nägschte Daag organisiert wärde kenne… dr Bummel-OK-Breesi isch denn aifach no zem Hoteldiräggter in Arcachon zitiert worde… nach däm formidable Gaumeschmaus hän mir 4 Glatte no biz in Usgang welle und drby miesse feschtstelle, dass me fyr in bordeauxnesischi Clubs nit numme z’jung, sondern, nai, offebar au z’alt ka si… nit alli hän die Tatsach so aifach kenne aggzeptiere… schlussändlig simmer ufeme Schiff anere Technoparty glandet… Durchschnittsalter (mir 4 inkl.) ca. 21.5 Joor… zu allem Yberfluss isch uns au vo allne Taxi-, bzw- Uber-Fahrer dr „meilleure jupe“ vorenthalte worde… e Frächhait!
Am nägschte Daag simmer miteme liichte Käterli uf Segways go s’scheene Bordeaux besichtige, alles unfallfrei notabene! Also fascht… aine het’s doch tatsächlig fertig brocht, sich ufem allerletschte Meter fascht no dr Fuess z’bräche…
Im Aschluss isch’s wytergange uf Arcachon, wo dr Bummel-OK-Breesi denn laider doch nit bim Hoteldiräggter het miesse asuuge… drfyr sin no di ydriggligi Dune du Pyla, e paar Auschtere und als absoluts Highlight e baar keschtligi Bulots (=> Meeresschnägge!!!) ufem Brogramm, bzw. uf dr Spiiskarte gstande… und will in Arcachon im Herbscht rain gar nyt los isch, het’s ufeme Bummel sogar emol e ziemlig ruhige Obe gäh… jo, und am nägschte Daag simmer denn wieder haime…

 

2017

Vom disjöhrige Oberwiler-Umzug git’s nit vil z’brichte… mir hänn au das Mol wieder zuegluegt… Unterdesse hämmer-ys ybrigens au scho dra gwehnt und s’macht-ys immer wie me Schbass! ;-)

Uf das Joor ane het’s usnahmswiis emol kai Änderige in dr Schnitzelbanggzämmesetzig gäh und mir sin wieder zu Viert an d’Arbet gange. Mir hän das Mol in dr Vorberaitig sogar e Schnitzelbanggweekend im Schwarzwald gmacht, passenderwiis im Hotel Baslerhof. Laider isch usser ere saumässig hoche Geträngg-Rächnig nit sehr vil drby usekoh… Bängg hämmer uf d’Fasnacht ane denn aber trotzdäm no e baar z’Stand brocht, so z.B. yber e Brexit, aimol me yber s’laidige Thema Dorfbolizischt, yber s’Ueli Forte-Bier vo dr Fischerstube, wo-ys dert e Nachtässe ibrocht het, yber d’Handschlagverwaigerer und sälbstverständlig au ybere Trump, bzw. yber syni Frisur. Alles in allem e sehr zfriidestellendi Aglägehait!

Yber e Bummel 2017 schwiigt em Sänger sini Heefligkait… di verhinderete Organisatore hän em Chronischt aber mittailt, dass sie sich au an dere Stell nomol in aller Form fyr ihres Versümnis wotte entschudlige! Immerhin erspart das em Chronischt e baar Ziile und divärse Läbere e arbetsrichs Wuchäänd… aber es wird definitiv nymme vorkoh!

 

2018

Jo, und somit simmer au scho im 2018 akoh, wo mir u.a. wieder mol dr Oberwiler-Umzug gluegt hän… scho e gueti Sach, aber sälber mitmache…? ;-)

Und jetzt zu de Bängg, will uf das Joor ane het’s nämmlig wieder Veränderige in dr Zämmesetzig gäh! Laider muess me sage, isch’s ainersits e eher unscheeni Gschicht gsi, wo letschtändlig zer Trennig, resp. zem Ustritt vom Wildi gfiehrt het (wo laider au immer nonig ganz abgschlosse isch), drfyr darf me erfrayligerwiis anderersits sage, dass es e sehr scheeni Gschicht isch, dass mir als Neyzuegang dr Leo derfe vermälde! Mir kenne ohni z’ybertriibe sage, dass mir do e wirklig guete Fang gmacht hän!
Das Mol simmer e Schnitzelbanggwuchäänd am Titisee go mache – same shit, different year muess me konstatiere, aber immerhin nit sone hochi Rächnig das Mol…
Bi de Schnitzelbängg hämmer u.a. di folgende Sujets gha: dr Schläger Constantin, em Harry sini Meghan, d’Basler Fasnacht als Wältkulturerb, No-Billag nadyrlig, s’Rauchverbot am Basler Bahnhof und als klare Höhepunggt #metoo!
Syteme Joor simmer jetzt ybrigens au am Basler Fasnachts-Zyschtig unterwägs!

Und was au wieder emol erwähnt mecht si: Scho syt Joore hämmer wunderscheeni Helge und das hämmer ainzig und elai dr Marlise z’verdangge! Ganz härzlige Dangg, Marlise!

Und wenn mir-ys scho am Bedangge sin, wämmer uf kai Fall dr Beat Wyssebärger vergässe, wo-n-ys an X Basler Fasnachte in sim Féérchtibuzze-Baizli Unterschlupf, Stauruum, Nahrig, z’Dringge, Wärmi, Schbass und ganz vil Bekanntschafte, sprich ganz aifach ganz vil scheeni und unvergässligi Zyt verschafft het. Und dä Dangg goht definitiv au an d’Aline! S’isch-ys wirklig immer e grossi Fraid gsi, bi Eych i’zkehre und die divärse Fasnachtsöbe lo usklinge…!
Ganz, ganz härzlige Dangg! Sehr, sehr gail isch’s gsi! Mir wärde’s vermisse!

Mir hän-ys usserdäm au intärn ney organisiert – mir bestehn jetzt us drei Co-Breesis und eme Vize-Breesi – hohoho…!

Jä, und ob Ihr’s jetzt glaubet oder nit… jetzt isch doch die Cliquegschicht tatsächlig wieder emol à jour… em Chronischt fallt somit e Riisestai vom Härze, will är sich jetzt ändlig emol nymme (zumindescht fyr e Zytli) d’Ermahnige ans Wyterschriibe vo dr Cliquegschicht muess aloose… :-)

Schad, sin unterdesse scho wieder 2 Joor umme… und dr Chronischt isch scho wieder hindedri…

Es syn ybrigens wyterhin alli härzlig yglade, uf „Facebook“ Fan z’wärde vo de Fäldschnäggli… aifach unter http://www.facebook.com/Faeldschnaeggli e loggere „Daumen hoch“ mache!