Schnitzelbängg 2017

---

• 
•  

Jä, am Bispiil Dieter Behring, do gseht me’s ziemlig guet,
in dr Kischte landet, wär – krummi Dinger draihe duet,
e Zytli goht das guet, doch nit lang und das isch s’Dumme –
drum stellt sich d’Frog, wie lang – lauft dr Wessels no frei umme…
© Fäldschnäggli '17

• 
•  

Jä, bim Federer het‘s kriselet, denn het är lang pausiert,
die Pause het ihn denn zu neyer Maischterlaischtig gfiehrt,
wenn e Pause so e Yfluss het, miesst me’s doch probiere –
und losst di nägschte Joor dr Baschi Dürr emol pausiere…
© Fäldschnäggli '17

• 
•  

Jä, d’Brite drätte us, sie dien d’EU verloh,
wenn me d’Velgger froge wurdi, wurde vili usegoh,
und wenn denn alli gange sin, kennt me’s ney lanciere –
und bi uns in dr Schwiz yber e Bitritt disggutiere…
© Fäldschnäggli '17

• 
•  

Jä, letschti wäg me Unfall, hän mir do ins Spittel miesse,
do duet-ys d’Frau Riederer us Hagedaal begriesse,
d’Schweschter Juanita Lopez us Spanie wurd grad koh,
sie het grad d’Schicht vo dr Li Wu Huan Yang ybernoh,
denn wird sie dr Doggter Plasik us Pole konsultiere,
är isch grad mit em Günther Krupp us Köln am Operiere,
wo uns denn e Butzfrau „Griezi“ uf Baseldytsch sait –
hän mir gmerggt, das isch en jetzt – dr Inländervorrang light…
© Fäldschnäggli '17

• 
•  

Numme in Oberwil gsunge:
Jä, kai Ysweiher plus, lägg, sin mir froh,
s’het jo au eso scho gnueg Ywohner do,
scho wägem Dorfpolizischt het me das ablähne miesse –
dä het jo gar kai Zyt, no me Falschparkierer z‘biesse…
© Fäldschnäggli '17

• 
•  

Jä, händ ihr das neye Bier do au scho mol brobiert,
wo d’Uelibrauerei unter Ueli Forte fiehrt,
mir hän welle, doch bim Bschdelle, simmer prompt, es isch nit glooge –
in ziemlig hochem Booge u(r)s dr Fischer-Stube gflooge…
© Fäldschnäggli '17

• 
•  

Jä, im schottische Hochland, im Loch Ness, do git’s e Wäse,
s‘wird ganz sälte gsichtet, ka me immer wieder läse,
au bi uns in dr Schwiz duet’s sone Wäse gäh –
me gseht’s au nur ganz sälte – es isch e Parmeläh!
© Fäldschnäggli '17

• 
•  

Jä, s’isch scho ganz lang här, do hän-ys d’Eltere vermittlet,
wenn aine aim d’Hand anestreggt, jä, denn wird sälli gschittlet,
Religion isch do kai Usred, unsre Bruch wott das eso –
nur wenn’s d’Hand vom Jogi Löw isch, denn darfsch’s bliibe loh…
© Fäldschnäggli '17

• 
•  

Numme in Oberwil gsunge:
Jä, dr DJ Antoine het dr Schuggerposchte boschtet,
drmit dert nit no länger alles vor sich aneroschtet,
är haig’s igseh, het är gmaint, mir finde’s nit verkehrt –
dass si Sound verhaftet und in e Gfängniszälle gheert…
© Fäldschnäggli '17

• 
•  

Jä, bi syne Laischte bliibe, isch was e Schueschter sott,
e Gärtner bi sym Räche und e Pfaff, s’isch glaar, bi Gott,
e Coiffeur bi sym Strähl und e Koch bim Frikassée –
und dr FCZ – in dr Nati B…
© Fäldschnäggli '17

• 
•  

Jä, letschti hän unsri Kinder d’Kryyde fyyregholt,
und drmit uf d‘Strooss e grosses Fäld an Bode gmoolt,
d’Idee isch jo no härzig gsi, s’Problem drby isch numme –
sythär stehn dert drinn ständig Stroossenutte umme…
© Fäldschnäggli '17

• 
•  

Dr Frisuurebangg...
(Melodie vom Mani Matter - Bim Coiffeur)

Jä, im Tower isch är gsässe, vorem Spiegel und luegt dri,
„fantastic“ und „terrific“ so muess sini Friise si,
und will är yberhaupt kai seriöse Coiffeur kenn,
miech är’se aifach jede Morge sälber „GREAT AGAIN“!
S’wird wild spekuliert yber die Hoor-Anomalie,
isch das wirgglig sini Matte oder kennt’s e fremdi si,
fascht kai Verbindig zu dr Kopfhut, das isch doch suschpäggt,
e Verhalte ab und zu wiene autonoms Objäggt,
scho dr Asatz isch verdächtig und s’git Froge zu dr Diggi,
will sälli nit im Normberiich vo Hoor-Extensions liggi,
au s’Verhältnis Diggi – Längi stimmt irgendwie nit rächt,
und glich bestoht är druf, das sig wirgglig alles ächt,
zerscht wird’s mit Head & Shoulders gwäsche, das isch essentiell,
aber jo nit fehne, will’s vo sälber troggne sell,
drno uf dr lingge Site e tiefe Siteschaitel zieh,
denn alles nach rächts strähle, nit z’spot und au nit z‘frieh,
drufabe figaresgg alles vo hinde fyre strähle,
zum am Schluss e Hoorspraywolgge mit dr Tolle go vermähle,
nach circa ere Stund isch die Friise fertig trimmt –
und uns allne glaar, dass mit däm Typ ebbis nit stimmt…

Dä spinnt doch dert over the ocean,
dä spinnt doch dert over the sea,
dä spinnt doch dert over the ocean –
drum bring back Obama to me
© Fäldschnäggli '17

• 
•  

Jä, in Baselland wott me d’Schwinger nit lo schwinge,
will sie schins Flora und Fauna usem Glichgwicht wurde bringe,
uns wott uns’re Obmaa nit lo schnäbbsle vorem Singe –
will-ys das agäblig au usem Glichgwicht wurdi bringe…
© Fäldschnäggli '17

D’Helge het gmolt d’ Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!