Bängg 2014

Schnitzelbängg 2014

Jä, rain statistisch, isch jede elfte schwuul,
drum het nit nur dr Schiri als e Pfiffe im Muul,
doch das isch nur e Mittelwärt, wo mir driber rede –
bim FCB isch‘s gar kain – bim FCZ isch‘s jede!
© Fäldschnäggli '14

Jä, das isch jetzt e STAN-dli fir e Super-STAN,
mir finde ihn STAN-tastisch, unsre STAN the man,
STAN-ding Ovations und STAN-dig numme Lob,
wenn ain so STAN-omenal spielt, isch das sicher nit e Schwob,
jä, do mien mir STAN-kere, das isch una-STAN-dig,
nur will vo dert schyns dr Grossbabbe vom STAN sig,
wurdi das zem STAN-dard, mir wänn’s ys nit usmole –
wott me unsre STAN-islas au sicher bald in Pole…
© Fäldschnäggli '14

Jä, d'NSA duet horche und sie duet bespitzle,
hochtechnisch digital dien sie alles usekitzle,
andri setze uf Natur und das syt siebzig Joore -
syt denn scho spitzle d'Brite mitem Prinz Charles syne Ohre...
© Fäldschnäggli '14

Jä, iber Tschingge het dr Tschäppät Witzli gmacht,
dr Rocchi iber d’Jude und gar niemerts het glacht,
au mir finde’s rassistisch und kenne’s nit begryffe –
aber dr Petkovic, dä Jugo, das isch doch e Pfyffe!
© Fäldschnäggli '145

Jä, sy kemme am Achti und gehn am Zwelfi,
sy kemme am Zwai und gehn am Finfi,
sy kemme am Achti und gehn am Zwelfi,
sy kemme am Zwai und gehn am Finfi,
Nai, das isch jetzt im Fall gar kai Läppli-Zitat –
aifach numme denn isch unsri Luftwaffe barat...
© Fäldschnäggli '14

Jä, am letschte Rhyschwimme, jetzt miend ihr mol lose,
het's Amis, Schwobe, Russe, Italiäner und Franzose,
sie maine, wo sie sich in Masse lehn dr Bach ab trybe –
wenn sie schwimme statt ywandere, derfe sie no blybe...

Jä, uf em Barfi hän unsri Fraue letschti welle,
fir e Schäferstyndli uns ins Hotel Basel bstelle,
d'Idee isch guet nur dass mir naime anders aane sotte –
In dr Innerstadt isch Verkehr jo jetzt verbotte…
© Fäldschnäggli '14

Jä, d'8er-Glais sin gleggt, iber d'Brugg bim Hafe stail,
und hinde wider aabe - und scho sin mir z'Wail.
nit nur wäg em billig Boschte isch d'Fraid do driber gross –
no scheener isch, so sin mir z'Obe d'Schwoobe schnäller los…
© Fäldschnäggli '14

Jä, wenn's uf dr Wösch e Flägg hett - duet me's dr Muetter bringe,
wenn ain vo uns krangg isch darf si Brueder mit go singe
Bim Wiggle und bim Stille, dörfe unsri Fraue draa -
und wenn d'Gmaini öbbis baut, macht's dr Lotti ihre Maa
© Fäldschnäggli '14

Jä, bim Start in d’Euro-Quali – isch d’Nati ziemlig gschwumme,
so ainiges het dert bim beschte Wille nimme gstumme,
taggtisch verbessere kenntsch no e Huffe Sache –
wie efters Dobbelbässli statt Dobbeladler mache…
© Fäldschnäggli '14

Jä, ufem Fuessgängerstraiffe het ain – und jetzt wird‘s bitter,
si Facebookstatus tscheggt und twitteret uf Twitter,
e Auti kunnt vo rächts – es dätscht – är liggt im Granggebett –
nur guet, dass dä Autifahrer s‘Liecht yhgschalte hett..
© Fäldschnäggli '14

Canción de caracolitos de campo 2014
(Melodie vo Los Lobos mit Antonio Banderas - Canción del Mariachi)

Jä, mir sin letschti – Zyyge worde – per Zuefall - s'isch no witzig
vonere stingg normale Regierigsrot-Sitzig
dr Conti sait in d'Rundi – mir derfe nit vergässe
nochhär im Drei-Keenig no mi Schwarzgäld go verfrässe

Refrain: Eyeyeyeyey – da‘sch Korruption!
Und zahlt wird das alles mit unsrem Lohn…

Wo sie dert anekemme, mien sie no bitz warte
dr Conti zellt si Gäld, dr Morin luegt scho moll in d'Karte
nervees kunnt dr Baizer sait dä Tisch isch – s'isch e Schand
fir d'Regierig reserviert, aber die vo Baselland

Zem Wäber rieft dr Räber, kumm mir rutsche bitzli zämme
jetzt isch jo wohl au klar – das mir zämme no ein nämme
wär wievill verdient – kenne si jetzt alli Prahle
und dr Hummer und dr Kaviar us dr Kaffikasse zahle

Do litet e Natel in dr Herzog ihrer Däsche
es isch e MMS – und das hett sich gwäsche
dr BVB - Baumgartner schribt - gäll Eva, das hesch noni
e Fetteli – gstoche scharf – und das unde ohni

Ich kumm eych grad ko hole, bi in dr Neechi nämmli,
und fahr eych heggscht-perseenlig mit em goldige Drämmli,
mir sin jo nit gytzig, drum wird offeriert,
e Champagner fir e Sagggäld vo mim Jingschte serviert!

Dä Schämpis isch e guete – halt e bitzli dyyr
dr Glych hän mir doch drungge bi dr IWB-Fyyr
dr Bryys spielt kai Rolle – sait dr Wessels ungeniert,
ha jo fir jedi Bauschdell no e Dausger schwarz kassiert

Do maint denn no dr Wüethrich, är haig no ganz wit unde
uf sim Kontouszug - e scheene Batze gfunde
das stimmt, sait dr Lauber – ich waiss, dass är nit liegt
ha jo si Kontouszug vo der Bank Coop au kriegt

Denn fliegt grad d'Pegoraro, wo sie so isch am Danze,
zämme mitem Morin - voll ufe Ranze,
wo sie so gheit und drby no "Aua" schreit,
isch ere doch zem Usschnitt no e Neetli usegheit,

Dr Brutschin froggt dr Baschi – Baschi hesch au no paar Frangge?
nai, bi grad mi Auti mit Olive-Eel go tangge
Hesch deert am Himmel gseh, wyter goht s‘ Vergniege,
mit em goldige Fallschirm kunnt grad dr Vasella z‘ fliege

Und so isch‘s witer gange – no die ganzi Nacht
sie hän denn bis am nägschte - Morge duuregmacht
und mir wisse jetzt, dass die s‘ nit ibertrybe
will s'Wichtigschte isch immer – aifach suuber blybe! - Ojé!!!
© Fäldschnäggli '14

D’Helge het gmolt d’ Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

Härzligge Dangg an Gérard Bachmann und Marco Stöckli fyr d' Helge-Arbet!