Schnitzelbängg 2022


gottyellow1.gif
Jä, fyr e Experimänt hän mir dr Beegg entfiehrt,
„Läck hätt de brännt und de Chopf isch äxplodiert“,
Jä, wottsch e Land regiere, dängg doch bitte dra,
fir sone Job muesch hytzedaags e dummi Friise ha,
Jä, die Teletubbies syn scho superglatti Gschtalte,
„Winke-Winke“ und „Oh-oh“, was sölle mir vo dene halte,
Jä, im Novämber syn mir gange go die Lyyche inezieh,
in dr Körperwälteusstellig, dä Typ git sich ächt Mieh,


falschi Deen, falsche Täggscht, ain singt z‘frieh und ain singt z’spot -
noch zwai Joor ohni Fasnacht wisse mir halt nimm, wie‘s goht…
© Fäldschnäggli '22

gottyellow1.gif
Jä, dr Wolf isch jetzt im Baselbiet - s‘allererschte Mol,
di siebe grissne Gaissli finde‘s nit so toll,
drotzdäm frait me sich in Lieschtel - do dra isch ebbis guet -
dass ändlig wieder mol dert ebber ebbis rysse duet…
plus 50% Zueschlag:
Zem Wäber sait dr Räber, loss ys jommere, s‘wär glatt -
denn zahlt die siebe grissne Gaissli sicher Basel-Stadt…
© Fäldschnäggli '22

helge3.jpg
Numme in Oberwil gsunge:
Jä, ich bi dr Schaggi, dr Dorfbolizischt,
so Banggomate-Spränge find ich dr greeschti Mischt,
s’isch nit mol wägem Schade und Gäld fählt au nur weeni -
ich mach mir eifach Sorge um e Schlof vom Aufranc Vreeni...
© Fäldschnäggli '22

gottyellow1.gif
Jä, mir hän jetzt beschlosse, und nai, es isch kai Spass,
offiziell sin mir jetzt Fraue und so stoht‘s au im Pass,
nit dass mir ys nimm männlig fyylte, nai, es isch eso -
mir wurde n-ys halt gärn friehner bangsioniere loh…
plus 50% Zueschlag:
Fir die Entschaidig ärnte mir vil Spott und Hohn -
s’singgt nit nur s Bangsionsalter, s’singgt au grad dr Lohn…
© Fäldschnäggli '22

helge5.jpg
Numme in Oberwil gsunge:
Jä, unsri neui Gmeini wird sicher wunderschön,
s’isch klar, dass mir ys das au öbbis koschte löhn,
bi somne Riiseloch mien die e Riisekäller baue -
s‘brucht halt e huffe Blatz zum alli Lyyche go verstaue…
© Fäldschnäggli '22

gottyellow1.gif
Jä, dä Videoschydsrichter het zimmlig oft biz Mieh,
entschaidet oft mol falsch, mol z‘spot und sälte z’frieh,
mit däne Qualitäte, dängge mir das goht:
«Ab mit dämm uf Bärn, als neie Bundesrot…»
plus 50% Zueschlag:
Wurd dä Schiri welle, dr Ersatz vom Muurer sy -
no tüschlet är sy Drillerpfyffe geg e Tryychle y…
© Fäldschnäggli '22

helge7.jpg
Numme in Oberwil gsunge:
Jä, dr Metzger Äschlimaa hört uff, är het welle goh,
dr Roland Brun us Ettige, het en übernoh,
mir hoffe, dass dä Lade ganz am Stügg wird blybe do -
will bi däne Ettiger isch das nit immer so…
© Fäldschnäggli '22

helge8.jpg
Jä, mir sin digg in Usgang - und das im Petit Bâle,
Hauptsach blutti Fraue - dr Räscht isch ys egal,
in jedem Etablissement hän mir e Cüpli gsoffe -
und drby au jedes Mol dr Pierin Vincenz droffe…
plus 50% Zueschlag:
Ufem Bummel in Davos - mir hän gmaint mir spinne -
hoggt im Schuppe, wo mir yne sin - au dr Vincenz dinne…
© Fäldschnäggli '22

gottyellow1.gif
Jä, «Wetten dass…» isch zrugg - dr Schawinski wieder do,
ABBA git e Comeback und au Benissimo,
alli sin sy zrugg - halt mit biz me Falte -
anschinend drifft Corona - doch nit alli Alte…
plus 50% Zueschlag:
Nadyyrlig sin mir froh und hoffe mir sin au no z’rette -
das Virus drifft jo schyyns näb de Alte au uns Fette…
© Fäldschnäggli '22

gottyellow1.gif
Jä, Koschtewuecher, Rodige, Baustelleexplosione,
wenn’s so witer goht, wott jo z’Basel kain meh wohne,
wenn me das so heert, no froggt me sich drno -
Isch är wirglig wäg, oder isch dr Wessels doch no do…
plus 50% Zueschlag:
Alles glych wie bim Wessels, was lerne mir do drus -
untrem Strich gseht s’Esthi Käller numme besser us…
© Fäldschnäggli '22

helge11.jpg
Jä, als Basler Primat duet‘s Di sicher quäle,
darfsch wyterhin nit stimme und au nit go wähle,
darfsch Di au nit wähle loh – s’isch unter aller Sau -
immerhin gilt das sicher fir e Eric Wäber au…
plus 50% Zueschlag:
Uh-Uh-Ah-Ah- Uh-Uh-Ah-Ah- Uh-Uh-Ah-Ah-Oh,
das haisst uf schimpansisch: «Eric s’Fiidle dinne loh!»…
© Fäldschnäggli '22

gottyellow1.gif
S' Home-Office – Liedi
(Melodie vom Joe Dolce - Shaddap You Face)

Jä, vor zwei Joor - s’isch datsächlig wohr,
mir hän ins Byro welle, sait dr Chef ys uf dr Schwelle,
«…uf dass die Wälle bricht, mache mir do dicht… -
…s’isch Home-Office-Pflicht!»
 
Mir dängge sofort dra, was mien mir alles ha,
e grosse Kaffibohnesagg, e Trainerhose-3-er-Pagg,
Schyssypapier und 3 Huustier oder vier -
…und gnueg Fyyrobebier!
 
Y sitz am Stuubetisch - iss e Croissant gfillt mit Fisch,
e Kaffi vornedra - dr Läptop springt nit a,
me loht mi ganz elei – Support git’s erscht am Zwei -
Y schaff vo dehei…
 
Näb’ mir do sitzt my Frau - in Trainerhose au,
het e Sitzig ganz normal - und striggt drby e Schal,
d’Kinder rysse an de Bei - anschynend hani zwei -
Y schaff vo dehei…
 
D’ Katz liggt zimmlig stuur - voll uf dr Taschtatur,
so schaffe kasch vergässe - will d’ Muus het sie gfrässe,
do hälfe nur no zwei - Liggöör frisch vom Ei -
Y schaff vo dehei…
 
Am Morge schnäll yygloggt - und denne XBOX zoggt,
drno e bizli chillt und ufem Balkon grillt,
scho Fyyroobe, jä nei - es isch jo bald scho zwei -
Y schaff vo dehei…
 
Dr Kittel nur im Schrangg, kai Chef do - gottseidangg,
immer untenohni losses bamble gobbelloni,
Y rauch fir mi elei, e Tschointli oder zwei -
Y schaff vo dehei…
 
Ha gmacht e Tisch us Arve, bi Profi uf dr Harfe,
wott dr Chef ebbis bälle, denn nimm y grad e Schnälle,
ufem Bildschirm wirggt är glei, y nimm grad nomol zwei -
Y schaff vo dehei…
 
Ha Grindweh gopfriedstutz, do hilft nur Kaffi Lutz,
denn git’s s’erschte Bier - am 10ni sin’s scho vier,
doch s’Bier blibt nit elei - no e Grappa oder zwei -
Y schaff vo dehei…
 
Sag, wo schaffsch denn Du? Dehei! - Und wo schaffsch denn Du? Dehei! -
Und wo schaffsch denn Du? Dehei! - Und wo schaffsch denn Du? Dehei! -
Und wo schaffsch denn Du? Dehei! - Und wo schaffsch denn Du? -
Y schaff vo dehei…
 
Jä, jetzt isch si Gschicht - die Home-Office-Pflicht,
dr Ängelbärger, s’isch eso, hätti lieber alles gloh,
doch jetzt isch är elei - und rysst e suure Stei -
Lukas, ….blyb doch dehei!!!
© Fäldschnäggli '22

D'Helge het gmolt d' Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!