Schnitzelbängg 2020 (Nit-Fasnacht)


helge1.jpg
Jä, als modärni Männer hämmer’s scho nit lyycht,
mir koche, wäsche, butze – bis jedes Stäubli wyycht,
unsri Fraue sin beschäftigt, uf Facebook alles z’laigge –
drum hämmer’s gar nit gmerggt, dass sii sin go straigge…
plus 50% Zueschlag:
Was mir aber gmerggt hän, mir hän’s miesse aggzebbdiere –
unsri Helgemoolere isch immer no am Broteschtiere…
© Fäldschnäggli '20

helge2.jpg
Jä, huescht – schnniif – schnuuder – mir gheere zu de Grangge,
schnuuder – huescht – schniif – hatschi – Gsundhait! Dangge!
Das isch nit s’Corona-Virus, wo-n-ys so loht niesse –
mir hän Eych numme welle uf Chinesisch do begriesse…
plus 50% Zueschlag:
Wobi mir das mitem Chinesisch hätte kenne bliibe loh –
s’het, so wie das usgseht, jo kai Chinese do…
© Fäldschnäggli '20

helge3.jpg
Jä, ich bi dr Schambbe, e Basler Bolizischt,
di falsche Bolizischte bschisse d'Lyt mit Lischt,
sie klaue s' Gäld vo de Biirger und sin drbi verglaidet –
y frog mi, was di falsche vo uns ächte unterschaidet…
plus 50% Zueschlag:
Y ka’s fascht nit sage, es fallt mir schambbar schwäär –
sii hän mi au verwitscht und jetzt isch mis Konto läär…
© Fäldschnäggli '20

helge4.jpg
Jä, sii hän dr Titel abgäh, sii draage-n-en jetzt nimm,
freiwillig, vo sich us, drum isch’s fir sii nit schlimm,
s’goht-ene viil besser ohni all die Titel-Sache –
und uns wurd’s besser goh, wenn das au YB so wurd mache…
plus 50% Zueschlag:
Doch laider längt das nit, mien mir Eych do brichte –
solang denn nit au freiwillig d’St. Galler dien verzichte…
© Fäldschnäggli '20

helge5.jpg
Jä, wottsch e Land regiere, dängg doch bitte dra,
fir sone Job muesch hytzedaags e dummi Friise ha,
dass e dummi Friise länggt, zem ganz an d’Spitze z’koh –
het-ys jo au scho mol e Maa us Öschtriich wisse loh…
plus 50% Zueschlag:
In dr Konsequänz haisst das, es isch eso per se –
statt em Marcel Koller muess dr Gress zem FCB…

© Fäldschnäggli '20

helge6.jpg
Jä, die Delifonkabine, die vom Barfi do,
sotte schyyns ins historische Museum koh,
denn stehn sii aifach hundert Meter wyter hinde –
vorusgsetzt nadyyrlig, dass die’se wieder finde…
plus 50% Zueschlag:
Wär nyt wird, wird Wirt, so haisst’s in unsre Braite –
und wär nyt ka, dä ka s’historische Museum laite…
© Fäldschnäggli '20

helge7.jpg
Numme in Oberwil gsunge:
Jä, d’Langmattstroos isch bachab – nai, es git’se nit,
au s’Kaffi im Coop isch zue, da’sch au nit so dr Hit,
mol yberlegge, was no gscheh isch – s’git sicher no vyyl –
ah nai, da’sch alles gsi, wo bassiert isch z’Oberwyyl…
plus 50% Zueschlag:
S’Guete an däm Bangg, wo mir jetzt do singe –
dä kasch logger au im näggschte Joor grad nomoll bringe…
© Fäldschnäggli '20

helge8.jpg
Jä, dr Hambbe Wessels, noch 11 lange Joor,
git si Amt jetzt ändlig ab, me glaubt’s nit, doch s’isch wohr,
s’bruucht e frische Wind, s’isch Zyt,  dass är jetzt goht –
mir hän scho Angscht gha, dass är blibt, bis s’Biozentrum stoht…
plus 50% Zueschlag:
Lieber wie s‘Ozeanium, hämmer dänggt drno –
hätt är‘s sotte mache und vo Afang a nit koh...
© Fäldschnäggli '20

helge9.jpg
ä, im Joggeli hän zwai ditschi Räpper welle räppe,
«Ou nai, das goht so nit!» sage d’Basler Fyyr-Schmiir-Läppe,
no sin sii halt uf Ziri - vilicht isch’s besser so –
will Schwoobe und Zircher hän bekanntlig s’glich Niveau…
plus 50% Zueschlag:
Und wo mir dänggt hän, s‘Niveau sig am Diefpunggt unde gstrandet –
isch doch brombbt in Ziri d‘Air Force One no glandet...
© Fäldschnäggli '20

helge10.jpg
Jä, dr Hamdi Halili - Trainerhose-Kosovar,
griegt z‘Buebedorf kai Schwizerbass, leggt Yspruch yy, da'sch glaar,
kennt är schutte «wie Behrami», wär är besser dra –
und hätt sicher au «bi Lara Guet» e gueti Chance gha…
plus 50% Zueschlag:
In Buebedorf dien sii sich ab Trainerhose steere –
in Basel wurdi är mit sälle zu dr Mehrhait gheere…
© Fäldschnäggli '20

helge11.jpg
S' CO2 - Medley
(Melodie vo Status Quo - In the Army now)

Jä, "how dare you" – het d'Greta gsait,
mir kämpfe fir s’Klima - sind Ihr berait?
Jä, wägem CO2, o-u-o, jä wägem CO Zwa-i!
 
Flugscham iberall – mir hän’s yhgseh,
und fliege zwor nit weniger, doch schämme-n-ys me!
Jä, wägem CO2, o-u-o, jä wägem CO Zwa-i!
 
Unsri Diesel-Auti hämmer obbtimiert,
und ufem Autidach – e Windrad montiert!
Jä, wägem CO2, o-u-o, jä wägem CO Zwa-i!
 
Zem Dringge bschtelle mir – me glaubt das kuum,
unsri Bier ab jetzt – ohni Schuum!
Jä, wägem CO2, o-u-o, jä wägem CO Zwa-i!
 
Will s'Klima bi uns Vorrang het,
gehn mir numme no – mit Griene ins Bett!
Jä, wägem CO2, o-u-o, jä wägem CO Zwa-i!
 
Au d' Indianer dien's begriffe,
und verzichte – uf d' Friedenspfiffe!
Wägem CO2, o-u-o, jä wägem CO Zwa-i!
 
E Grillverbot git's sowiso,
mir ässe d' Brootwyrscht jetzt scho roh!
Jä, wägem CO2, o-u-o, jä wägem CO Zwa-i!
 
Mir gheere d' Zircher jetzt scho gränne,
will darfsch au nimm – dr Böög verbränne!
Wägem CO2, o-u-o, jä wägem CO Zwa-i!
 
Will d'Greta iiber s’Fliege fluecht,
hämmer Alternative gsuecht!
Jä, wägem CO2, o-u-o, jä wägem CO Zwa-i!
 
(Melodie vo Toto - Africa)
Fir s’Klima schwimme mir uf Afrika,
e Flugi hämmer doch nie neetig gha,
sunscht braitet sii sich us, die Sahara,
e Wieschti wämmer doch nit z’Basel ha…
 
(Melodie vom Scott McKenzie - If you're going to San Francisco)
Mir gehn nimme uf San Francisco,
e Jointli rauche, kenne mir au do,
mir gehn jetzt nimme uf San Francisco,
und wenn, denn heegschtens, mit em Pedalo…
 
(Melodie vom Udo Jürgens - Ich war noch niemals in New York)
Mir gehn au nie meh uf New York, mir gehn au nie meh uf Hawaii,
uns nimmt jo niemerts uf sim Beetli mit,
mir gehn au nie meh uf New York, mir gehn au nie meh uf Hawaii,
und dass mir fliege, wott jo s'Greetli nit…
 
(Melodie vom Klaus & Klaus - An der Nordseeküste)
Wenn s’Klima so uffhaizt, wird’s bald eso syy,
denn hämmer die Nordsee scho bald do am Rhy…

Doch an d’Nordseeküschte – im Norde Oobe –
dert gehn mir nimm ane – doch nur wäg de Schwoobe…

Denn wär d’Nordseeküschte – das wär doch nit schlimm –
bi uns do vor Basel und d’Schwoobe gäbt’s nimm…
 
(Melodie My Bonnie is over the ocean)
Mir fliege nimm ybere Ozean,
e Gryzfahrt darf's au nimme syy,
mir fahre au nimm mitem Auti –
drum bliibe mir z’Basel am Rhy…
 
Z’Basel an mim Rhy, jo deert mecht i syy...
© Fäldschnäggli '20
 
D’Helge het gmolt d’ Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!