Schnitzelbängg 2010 (Sieg am Schnaabelbryys)


helge1.jpg
Jä, 80 Liter Bier hämmer drungge, do liggsch ab,
druff abe 50 Fläsche „Château Briand neuf du Bab“,
garniert hämmers mit Koks, Heroin, grad dur d’ Kanyyle -
aifach so zem wysse wie ne Gaddafi sich duet fyyle…
© Fäldschnäggli `10

helge2.jpg
Jä, dr Golfer Tiger Woods, jetzt mien dir alli lose,
sälle het mächtig Muusig in de Hose,
ab mit ihm in Bundesrot, mir fände das dr Hit -
wills dert zimmlig vyl Lecher z’ stopfe git!
© Fäldschnäggli `10

helge3.jpg
Jä, vor unserem letschte Flug goht's ab in Nackt-Scanner,
drby isch's doch so schreggligg kalt in Basel zmizt im Jänner,
nach em Check schwätzt uns kokett-charmant das Zellner-Hasi a -
„Mit sovyl Potenzial miend ihr an d'Extasia...“
© Fäldschnäggli `10

helge4.jpg
Jä, Alte, Alte, waisch, ey Alte, waisch Alte,
Alte, Alte, waisch Alte, me ka’s kuum ushalte,
eso duet me doch d’Schbroch ad absurdum fiehre –
aber s’deent effeggtiv eso, wenn hyte Jungi disggutiere…
© Fäldschnäggli `10

helge5.jpg
Da’sch dumm, dumm, dumm, dumm, dumm...
(Melodie vom Mormonesong us "South Park")
Jä, dr Franco paggt dr Beg an de Hoor – da’sch dumm, dumm, dumm, dumm, dumm
dr Schumi zrugg, s’isch laider woohr – da’sch dumm, dumm, dumm, dumm, dumm
dr Magnin goht zu Ziri zrugg – da’sch dumm, dumm, dumm, dumm, dumm
dr Hasselhoff dringgt gärn e Schlugg – da’sch dumm, dumm, dumm, dumm, dumm
dr Zanni, hert aifach nit uff – da’sch dumm, dumm, dumm, dumm, dumm
dr Hirschmaa, da schloht gärn im Suff – da’sch dumm, dumm, dumm, dumm, dumm
dr Busacca zaigt dr Mittelfinger – dumm, dumm, dumm, dumm, dumm
em Polansggi lauft’s mit Junge ringer – dumm, dumm, dumm, dumm, dumm
YB glaubt, sy wärde Maischter – dumm, dumm, dumm, dumm, dumm
dr Shiva Mike glaubt au an Gaischter – dumm, dumm, dumm, dumm, dumm
Ziri hett kei Stadion meh – da’sch dumm, dumm, dumm, dumm, dumm
und Maischter wird dr FCB – olé – olé – olé!!!
© Fäldschnäggli `10

helge6.jpg
Jä, dr Michael „Jacko“ Jackson liggt jetzt in dr Gruebe unde,
sy Doggter syg tschuld, mir hän’s erschreggend gfunde,
dä Maa, dä het allem Aschyn a –
nit sone gueti Nase gha…
© Fäldschnäggli `10

gottyellow1.gif
Jä, in Bärn im Bäregrabe, bym Finn däm liebe Bär,
isch ynekoh sehr aifach, aber usekoh isch schwär,
will kunnsch däm Bärli z’noch, denn bisch em Eländ gweiht –
ach wär doch nur das Seggli em Gass dert ynegheit…
© Fäldschnäggli `10

 

helge8.jpg
Jä, d‘ Schwobe kemme in Schare, es kemme ganzi Truppe,
als greschti Immigrantegruppe dien sy sich entpuppe,
bald git’s nur no Wysswyrscht und Wyrscht im Curry-Bett –
mir froge, worum me statt de Minarett nit d‘ Schwobe verbote het…
© Fäldschnäggli `10

helge9.jpg
Version Oberwil:
Jä, hän sie das scho gheert vo dene zwai Uigure,
wo diräggt us Guantánamo dure Jura dure toure,
aigentlig kennt dr Jura die zwai uf Oberwil gäh –
drfyr miesste sälli numme s' Lotti Stokar näh…

Version Basel:
Jä, hän sie das scho gheert vo dene zwai Uigure,
wo diräggt us Guantánamo dure Jura dure toure,
aigentlig kennt dr Jura die zwai uf Basel gäh –
drfyr miesste sälli nur dr Guy Morin näh…
© Fäldschnäggli `10
 

helge10.jpg
Jä, dr Berlusconi wird beworfe, dr Papst wird attakiert,
by dr Leuthardt fliege Stiefel, au d’Rihanna het kassiert,
als Star, do läbt me gfeehrlig, da‘sch nit eso dr Hit –
lägg, syn mir froh, erkennsch ys ohni Larve nit...
© Fäldschnäggli `10

gottyellow1.gif
Jä, mir hän e CD gmacht – multimedial,
mit Foti-, Film-, MP3- und ghaimem Material,
mir mechte si verschängge, aber hätte do e Bitt –
verkaufet denn das guete Stygg dr Merggel Angie nit...
© Fäldschnäggli `10

gottyellow1.gif
Version Oberwil:
Jä, dr Federer het Zwilling, do dien mir gratuliere,
sälli wärde im Tennis sicher au mol wältwyt fiehre,
dr Epfel gheit nit wyt vom Stamm, dängge-mir drby –
so miesste mir däm Fall Fynfling vo de Schnäggewaggis sy...

Version Basel:
Jä, dr Federer het Zwilling, do dien mir gratuliere,
sälli wärde im Tennis sicher au mol wältwyt fiehre,
dr Epfel gheit nit wyt vom Stamm, dängge-mir drby –
so miesste mir däm Fall Fynfling vo Schorsch und Ryssblei sy...
© Fäldschnäggli `10

helge13.jpg
Dr Hansruedi Merz...
(Melodie vo "Im Wagen vor mir fährt ein junges Mädchen")
 
Jä, im Auti vor uns fahrt dr Hansruedi Merz,
är isch z’friede und lächlet, da'sch kai Scherz,
är syg unterwägs nach Lybie und das no ganz elai –
immerhin kunnt nur s’Gepägg denn wieder hai...

Jätä-jätä-tätätätärä…(Bumbumbumbum)
Jätä-jätä-tätätätärä…

Jä, im Auti vor uns fahrt dr Hansruedi Merz,
är isch sälber am Styyr und da'sch kai Scherz,
wo mir ihn yberhole, hän mir s’Gfyyl mir syn nit dicht –
dä Maa, wo do am Styyr hoggt, het kai Gsicht…

Jätä-jätä-tätätätärä…(Bumbumbumbum)
Jätä-jätä-tätätätärä…

Jä, im Auti vor uns fahrt dr Hansruedi Merz,
är isch nymme elai und da'sch kai Scherz,
näbedra hoggt jetzt dr Haltiner vo dr F-I-N-M-A –
und dr Villiger und dr Grübel hindedra…

Jätä-jätä-tätätätärä…(Bumbumbumbum)
Jätä-jätä-tätätätärä…

Jä, im Auti vor uns fahrt dr Hansruedi Merz,
är sott nymme am Styyr sy da'sch kai Scherz,
worum het dr Gaddafi nit ihn als Gaisle gno –
denn wär’s Broblem jetzt dert und nymme do...

Jätä-jätä-tätätätärä…(Bumbumbumbum)
…und jetzt alli…
Jätä-jätä-tätätätärä…(Bumbumbumbum)
Jätä-jätä-tätätätärä…
…und jetzt nur die uf dr inke Syte…
Jätä-jätä-tätätätärä…(Bumbumbumbum)
Jätä-jätä-tätätätärä…
…und jetzt alli uf dr rächte Syte…
Jätä-jätä-tätätätärä…(Bumbumbumbum)
Jätä-jätä-tätätätärä……………… :-)
© Fäldschnäggli `10

 

gottyellow1.gif
Us aggtuellem Ahlass, isch dä uns no uf dr Gass spontan ihgfalle:
Jä, dr Simon Ammann fliegt und fliegt und fliegt und fliegt,
är fliegt und fliegt und fliegt, nit nur will är nüt wiegt,
ar fliegt und fliegt und fliegt und fliegt und fliegt und fliegt so wyt –
är wurd no wyter fliege aber mir hän nymm meh Zyt...
© Fäldschnäggli `10

 

gottyellow1.gif

Jä, scho e ganzes Joor erfrayt är unseri Sinn,
und au fyr unsers Dorfbild isch är e ächte Gwinn,
sone draumhafts Liechterspiel findsch niene, s’isch eso –
drum blyybe in däm Graisel jede Obe d’Auti stoh...
© Fäldschnäggli `10

D’Helge het gmolt d’ Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!