Schnitzelbängg 2009


Jä, dr Federer verliert nur no gege dr Nadall,
nai laider stimmt das nit  -  är verliert fascht yberall,
dr Rotschi, dä bringt’s nymme, jä sie, es isch eso,
zem Glygg isch dä vo Wollerau, und gar nit vo do...
© Fäldschnäggli `09

Version Oberwil:
Jä, d'Lara Guet isch guet und dr Muurer, dä muurt,
dr Roland Näf, dä näft und dr Kuurer, dä kuurt,
dr Blocher, dä blocht, jä, dr Mörgeli au,
nur was s' Lotti Stokar macht - das - waiss kai Sau...

Version Basel:
Jä, d'Lara Guet isch guet und dr Muurer, dä muurt,
dr Roland Näf, dä näft und dr Kuurer, dä kuurt,
dr Blocher, dä blocht, jä, dr Mörgeli au,
nur was dr Guy Morin macht - das - waiss kai Sau...
© Fäldschnäggli `09

Jä, letschti simmer mit em Schiff dur e Golf vo Ade gschifft,
wo unser Schiff uff e Schiff vo Pirate trifft,
dr Chefpirat will Millione, sunscht macht är Stress,
är bruuchis fyr e Coiffeur – es isch dr Gilbert Gress...
© Fäldschnäggli `09

Jä, är isch jetzt nymme Knächt – dr Ueli isch jetzt Pächter,
und macht e ungerächti Wält - e bitzeli gerächter,
und wenn är jetzt beschwingt - us dr Raihe danzt,
denn isch das will är immer no - Hanf im Garte pflanzt...
© Fäldschnäggli `09

Jä, dr Peer Steinbrück isch e *Piep*, es isch eso,
e riese *Piep* und e *Piep*, ä *Piep* jä sowieso,
zuedämm isch er au e *Piep*, wär äggscht hett dä Dottel gwählt,
findet ihr nit au, dass ihm s'glaine Schnaizli fählt...
© Fäldschnäggli `09

Jä, das neye Rauchverbot -  das finde mir nit guet,
nur no dusse rauche, lägg hän mir e Wuet,
wenn das au fyr dä Käller zellt  -  denn miend ihr’s verstoh,
wär uns nägscht Joor wott loose, muess uf d’Strooss uusekoh...
© Fäldschnäggli `09

Jä, Basel kriegt si Spirale nit, mir finde das schaad,
anstatt scheeni Kurve, blibt halt alles graad,
wieso denn immer graad und nit mol e Kurve näh,
hätt sich das dr Jörg Haider gsait, denn wurd’s en hyt no gäh...
© Fäldschnäggli `09

Jä, wäg em Babbe Ratzi  -  git’s e Ryysepuff,
was nimmt dä au in d’Kirche e Nazi wieder uf,
jetzt laufe däm Duubel die Gläubige drvo,
wenn by uns e Schwob dr Chef wär, denn wurde mir au goh...
© Fäldschnäggli `09

Jä, sy hän jetzt freyi Bahn, d’Bulmäne und d’Rumgare,
sy kenne ohni Hindernis in d’Schwyz ynefahre,
mir hän mit däm kai Mieh, das kunnt scho guet eso,
me het jo Eych au alli in dä Käller ynegloh...
© Fäldschnäggli `09

Dr Sämi...
(Melodie vo "Bolle reiste jüngst zu Pfingsten")

Jä, dr Sämi het sich ygsetzt fyr unseri Armee,
mir bruuche no me Panzer und wänn me Flugzyg gseh,
doch s’Ryschtigsbrogramm isch  -  dr Bach ab wie gschmiert

Refrain:
aber glych het sich dr Sämi ganz brächtig amysiert,
aber glych het sich dr Sämi ganz brächtig amysiert...

Jä, denn het me ihn als halbe Bundesroot abeputzt,
är syg doch nur e bleede - Blinddarm, wo nyt nutzt,
als Bär ohni Kralle het me ihn tituliert

Refrain:
aber glych het sich dr Sämi ganz brächtig amysiert,
aber glych het sich dr Sämi ganz brächtig amysiert...

Jä, als Sportminischter  -  het är d’EM gmänätscht,
laider het’s denn trotzdäm d’Nati  -  grad suuber usebrätscht,
dr Frei het afo hyyle, die ganz Schwyz isch schockiert

Refrain:
aber glych het sich dr Sämi ganz brächtig amysiert,
aber glych het sich dr Sämi ganz brächtig amysiert...

Jä, und d’Näf-Affäre  -  het ihm no s’letschte gäh,
är het d’Schuld ums Verregge  -  nit uf sich welle näh,
stuur wie-n-e Byffel het är alles negiert

Refrain:
aber glych het sich dr Sämi ganz brächtig amysiert,
aber glych het sich dr Sämi ganz brächtig amysiert...

Jä, dr Sämi Schmid, sälle isch jetzt Gschicht,
vyl digger als am Afang  -  und das nit nur im Gsicht,
aber s’isch ihm Wurscht will är isch jetzt pensioniert

Refrain:
s' Glyche isch am Peter Kurer au bassier,
nur sälle het sich nid so brächtig amüsiert!
© Fäldschnäggli `09

 

Jä, achtesächzig Milliarde dailt dur 7 Millione,
git knapp 10 Tausig fyr alli Schwizer Persone,
mir zahle das dr UBS – isch das nit vellig grangg?
Gänd-ys au 10 Tausger – mir syn jo au e Bangg!

Jä, aber 10 Tausig längt-ys nit, mir bruche do no me,
mir miesste do fyr jede sicher zwanzig Tausig seh,
unsri Krise isch brutal - mir lyyde grossi Quale,
will sunscht kenne mir -  unseri Boni nymme zahle...

Jä, zem  10te mol  -  Schni-, Schna-, Schnitzelbängg,
fyyre mir das Joor - und wänn vo Eych e Gschängg,
jä, jetzt kunnt’s digg, mir mien no e Zueschuss ha,
will by Jubilee falle Sonderboni a...

Jä, findet Ihr nit au - s’Ändi deerft jetzt ko,
Ihr hän gnueg vo uns -  mir sotte langsam go,
denn miend ihr aifach wisse - Ihr sin wider dra,
will mir mien no e Abgangs - entschädigung ha...
© Fäldschnäggli `09

 

D’Helge het gmolt d’ Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

Aktuell sind 78 Gäste und keine Mitglieder online