Schnitzelbängg 2005


Jä, isch är jetzt scho gschtorbe oder isch är no do,
wiilt är no unter uns oder het är uns verloh,
scho lang blogt uns die Froog, villicht wüsse Ihr das jo,
Jä, läbt denn dr alti Holzmichel no?

.......jaaaaaa er lebt noch, er lebt noch......
© Fäldschnäggli `05

Jä, mit Helge, Bänjo und Gitarre, sin mir uf Ziri gange,
dört nämme uns grad 13'000 Schugger schwer in d’ Zange,
viel lieber wäre mir im Basler Wooghof ghoggt,
und hätte denn die ganz Nacht mit em Behring duurezoggt.
© Fäldschnäggli `05

Jä, hätt dä Maa kei Larve a, wurd ihn jede kenne,
und jede vo Euch do, wurd au sy Namme kenne nenne,
Jetzt verrote mir Euch öbbis, ehrlig gseit das isch dr Knüller,
dä do mit em Bänjo, das isch dr Heiri Müller.
© Fäldschnäggli `05

Version Oberwil:
Jä, völlig perplex, verstört und konschterniert,
sprochlos, verwirrt und zimmlig fescht schockiert,
wenn das e Zueschtand isch wo Ihr wieder mechted ha,
denn bliebet numme sitze, dr Chines isch noch uns dra.
© Fäldschnäggli `05

Version Basel:
Jä, völlig perplex, verstört und konschterniert,
sprochlos, verwirrt und zimmlig fescht schockiert,
eine wo dä Zueschtand regelmässig duet erlange,
isch dr Zubi jedesmol wenn är die Balle sotti fange.
© Fäldschnäggli `05

Jä, jetzt kunnt no öbbis ärnschts, nai, mir wänn uns nid beklage,
mir hänn halt eifach s’ Gfühl gha, mir miesste Euch das sage,
Mir maches wie dr Blocher, sälle finde mir dr Hit,
gfallt eim vo uns e Bangg nid, jä, denn singt är halt nid mit.
© Fäldschnäggli `05

Version Oberwil:
Jä, d’ Buebe us em Hüslimatt, finde d’ Meitli wow,
ihri kurze Oberdail und d’ Stringtangas au,
die Buebe wärde abglänggt vo viel z’ viel Dekolté,
doch, wie sölle sälli vollbekifft die Dekolté no seh?
© Fäldschnäggli `05

Version Basel:
Jä, d’ Buebe us em Kohlebärg, finde d’ Meitli wow,
ihri kurze Oberdail und d’ Stringtangas au,
die Buebe wärde abglänggt vo viel z’ viel Dekolté,
doch, wie sölle sälli vollbekifft die Dekolté no seh?
© Fäldschnäggli `05

Jä, s’ Frei’s ihre Alex, dä isch Götti vome Lama,
s’ isch allne no presänt, das Spuckaffäre-Drama,
wär e Hundekaigel gfloge, em Gerrard tief in Nagge,
denn wär dr Frei jetzt Götti vonere Hundefidlebagge.
© Fäldschnäggli `05

Jä, so e ganz glains Schmunzle kenne mir uns nid verkneife,
wenn mir in Gedangge d’ Zircher Stadionwält dien streife,
in d’ Stammzälleforschig sott me s’ Stadiongäld inveschtiere,
und druff hoffe, dass mol gschiedi Zircher exischtiere!
© Fäldschnäggli `05

Jä, d’ Flamingos sin am  briele, dr Gecko isch verruggt,
d’ Pinguin trage schwarz, und s’ Bison isch bedruggt,
dr Pfau schloht nümme s’ Rad, s’ Okapi isch verdutzt,
hätti doch dr Ständerot em Hirsch s’ Horn nid gschtutzt.
© Fäldschnäggli `05

Jä, hachem la hach, chelem me fu, chelem na schah,
hilfa lachem, schalem lechem, plem plem suna,
helchele schem, schliocharum, trelechetetem mefach,
cheldriomok, lanikschelach, cheldrium tak malanach,
Nai, mir hän kai Halskranket, syn fit und zwäg rundum,
das syn aifach d' Folge vom Imam-Studium...
© Fäldschnäggli `05

Version Oberwil:
Jä, stellet Euch mol vor, wär är nid dr Chämp?,
unsre Ruedi Mohler als Chef im Dschungelcämp,
doch mir als Allgemeinheit hätte sicher meh drvo,
wurd me ihn im „The swan“ e bitzli schöner mache loh!
© Fäldschnäggli `05

Version Basel:
Jä, stellet Euch mol vor, wär sie nid dr Chämp?,
unsri Gigi Oeri als Queen im Dschungelcämp,
doch mir als Allgemeinheit hätte sicher meh drvo,
wurd me sie im „The swan“ e bitzli schöner mache loh!
© Fäldschnäggli `05

Jä, e Muetterschaftsversicherig hett jetzt jedi Frau,
Das finde mir sehr fair, will dr Vatter schafft jo au,
Dass Fraue wyter schaffe wänn, egal was au passiert,
Das hett d' Anita Fetz uns zimmlig dütlig demonschtriert!
© Fäldschnäggli `05

Alles isch z’ tüür.....
Alles isch z’tüür, alles isch z’tüür, z’ tüür isch die ganzi Nation,
alles isch z’tüür, au unsri Stüür, für das hän mir viel z’ wenig Lohn!

.....zum Glück git’s jo no d’ Süpercard und Cümülüs, me spart und spart,
und Märkli, Prämie und Rabatt, jo spare isch so cheibe glatt!

.....au d’ Gläser hämmer kauft mit Pynggt, obwohl mir wüsse mir wärde glinngt,
bi dr Ballaktion, es isch nid glooge, wärde mir grad nomol betroge!

.....dass s’ Drämmlifahre gratis wär, wünscht sich nid nur dr BVBär,
au s’ Auto, und sigs nur bim roschte, duet uns e huffe Bazeli koschte!

.....vom Joggeli hän mr d’ Joohreskarte, zahle viel aber mien nie warte,
mir hän au no e Familiepass, dä Pass macht Spass es isch so krass!

.....wenn an uns s’ schlächte Gwüsse nagt, denn göhn mir halt uf Schnäpplijagdt,
und kaufsch di Wyy im Coop jetzt y, profitiersch drby vom „Prix Garantie“!

.....am Leesli – Rubble isch’s z’ verdanke das mir 3 Rappe billiger tanke,
göhn zum Beck hän kei Gäld, Oh Schreck, denn gämmer em Beck halt e Rekascheck.

.....Friehner het’s sich wenigschtens rentiert, hesch e Krankheit fingiert und IV kassiert,
au dr Zins uf dr Bank isch nymme zem Lache, drum het das dr Behring dörfe mache!

.....kaufsch Bebbi-Sägg uf's Mol 3 Rolle schöpft d' Eva Herzog usem Volle,
und kaufsch 2 Päggli Zigarette, duesch em Bund d' Finanze rette!

.....drum mache mr jetzt do reine Tisch, will uf dr Wält nüt gratis isch,
hän mr dänggt mir mache Euch e Geschängg, und schängge Euch die Schnitzelbängg!!!
© Fäldschnäggli `05

 

D’Helge het gmolt dr Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

Aktuell sind 57 Gäste und keine Mitglieder online