Schnitzelbängg 2004


Version Oberwil:
Jä, sone wisses Tigerli hett dr Roy vernascht
Vermuetlig hett äs ihn, vo hinde überrascht
Wo mir das ghört hän, hän mir’s au em Schickewirt verzellt
Dä hett das falsch verstande und sich sone Tiger bstellt
© Fäldschnäggli `04

Version Basel:
Jä, sone wisses Tigerli hett dr Roy vernascht
Vermuetlig hett äs ihn, vo hinde überrascht
Wo mir das ghört hän, hän mir’s au em Minu grad verzellt
Dä hett das falsch verstande und sich sone Tiger bstellt
© Fäldschnäggli `04

Jä, dr Gouverneur vo Californie isch dr Schwarzenegger
gits vo ihm e neue Streife, schällt bi uns dr Wegger
au dr Neuschti hämmer welle seh, hän gwartet duss im Räge
und sin denn statt im Multiplex im Birsig unde gläge
© Fäldschnäggli `04

Jä, letschti hämmer imne Restaurant e Ragglett welle ässe
Dr Källner lacht uns us „haha, dä Kääs könd ihr vergässe“
Die vom Wallis häns verspielt, mir göhn nie meh dört abe
Jetzt hämmer näbem Röschti- au no e Ragglettgrabe
© Fäldschnäggli `04

Jä, „hallo Du mi edle Ritter sag wie gohts Dir denn eso“
So hett das Mail agfange wo mir letschti hän bekoh
„Wenn mi Feriefotialbum seh willsch muesch uf dä Link kligge“
Jä aber nai........
Do gohts jo nit um Ferie do gohts jo nur ums......
© Fäldschnäggli `04

Jä, „Du sag mol kunnsch au mit, i gang e bitz go snöbe?“
„Nei sorry ha kei Zyt, hütt und die nägschte Öbe“
„Uf Saas Fee, Davos oder Laax, verzell wo gohsch denn ane“
„So wyt muess ich doch nümm, i gang in d’Talstrooss uf d’Schikane“
© Fäldschnäggli `04

Jä, si sin zämme glügglig gsi, das hän alli dänggt
Und är hett ihre au e gsunds Buschi gschänggt
Mir hän uns wirgglig gfrogt wieso dr Haki d’Frau verloht
Wohrschienlig hett är gmeint är kriegi Gäld wenn är goht
© Fäldschnäggli `04

Jä, alli sueche ihn scho lang, aber händ en noni gfunde
Villicht isch är jo irgendwo in däm Lokal verschwunde
Aha si händ en gfunde, unter ihrem Tisch
Löhn’s en nur dört ligge, s’isch jo nur e blöde Fisch
© Fäldschnäggli `04

Jä, mitere Hightechsonde hän si uf em Mars dört unde
Noch johrelanger Suechi, e bitzli Wasser gfunde
Gits ächt scho ä Grät wo me könnt nochwiese drmit
Dass es im George Bush sim Kopf nit nur Wasser git
© Fäldschnäggli `04

Jä, mir stelle ihne vor, das sin unsri alte Sogge
Dr eint isch jetzt e Sparstrumpf, mir sin e bitz verschrogge
Dr ander hett e bruune Rand es duet uns deprimiere
will zämme mit fünf Halbschueh dien si unser Land regiere
© Fäldschnäggli `04

Jä, mir hän letschti Saddam gspielt, hän uns e Ärdloch baut
Mir hän uns Bärt lo wachse und uns nümme usetraut
Uf eimol klopfts an Deggel öbber schreit löhnd mi do abe!
Leider nei, Ruthli Metzler du muesch sälber afoh grabe!
© Fäldschnäggli `04

Jä, New Pöblic Mänätschmänt das isch e tolle Namme
Ob das könnt funggtioniere, frooge mir uns amme
Dr Tschudin hört me sage die Beamte mieche mit
Wär hett do gseit in Basel gäbis d’Vogelgrippe nit?
© Fäldschnäggli `04

S’ Zündhölzli
S’hett ein e Zündhölzli azündet und das hett e Flamme gäh
Und är hett für si Ragetli welle Füür vom Hölzli näh
Aber s’Hölzli isch drvo und ans ganze Füürwärk koh
Und was denn so passiert isch wird euch d’Sprooch verschloh

Die Rageetli sin in d’Luft in alli Richtige drvo
Sin ganz luschtig explodiert, s’Publikum macht „aah“ und „ooh“
D’Stimmig die isch ganz famos um nit z’sage grandios
Und alli frooge sich gohts jetze richtig los

Und so isch es denn au gsi, plötzlig gits e riese Flamme
dr gleini Ruedi Mohler segglet hülend zu dr Mamme
sini Mamme isch empört aber sunscht hetts niemerds gstört
denn hett me au scho bald emol d’Sirene ghört

alli hän sich richtig gfreut, wo denn d’Füürwehr isch ytroffe
aber numme bis si gmerkt hän „ou, die sin jo alli bsoffe“
sin wie d’Hiehner ummeghetzt und hän gseit „mir lösche jetzt“
und prompt hän si die Wohnig unter Wasser gsetzt

Jä, es wird halt zimmlig tüür, wenn me nit ufpasst mit Füür
Schlussändlig wälzt sich alles ab uf unsri Gmeinistüür
Aber ei Vorteil i wett, hett au das verkohlte Bett
Nämmlig dass das tolle fescht e Attraktion gha hett
© Fäldschnäggli `04

Es isch so wyt wäg...
Uf dr Pfalz sitzt ein, luegt richtig Norde und drby verschriggt
Wo är s’WC vo dr Bar Rouge im Mässeturm erbliggt
E Frau lüpft grad ihr Röggli, dr Ander dä wird still
Är probiert gnauer z’luege, doch gseht nit vill will...

.....es isch so wyt wäg, es isch so wyt wäg,
die scharfi Brut im Mässeturm isch eifach viel z'wyt wäg!

Platz 1 bis 8 für Östrych, nai das isch nit glooge
Fahrt sunscht kei Nation me schi, mir wärde glaub betrooge
„Wieso“hän mir dr Cuche gfrogt „krieged Ihr nume ufs Dach
und dä hett gmeint das mit däm Ziel syg sone Sach.....

.....es isch so wyt wäg, es isch so wyt wäg,
das cheibe hüere Ziel isch für uns Schwizer viel z'wyt wäg!

Dr Tramchauffeur vom 2er-Tram fahrt richtig Stadt
Mit 60 in e Kurve, findet sälle glatt
Es funggt, quitscht und lärmt, s’halbe Tram fahrt näb de Schiene
Egal denn im Bunnyhouse wartet sini Biene... doch...

.....es isch so wyt wäg, es isch so wyt wäg,
si Biene im Bunnyhouse isch eifach viel z'wyt wäg!

E Blatt Papier und öbbis z’Schriebe, längt däm Luusbueb scho
Zum e Verträgli unterschriebe, mir mien ihn au verstoh
Dr Haki spielt bi Stuttgart und mir hän uns gfroggt
Wieso ächt hett ihn s’Agebot vo Istanbul nit gloggt...?

.....es isch so wyt wäg, es isch so wyt wäg,
denn wäri doch si Mamme mitem Znünibrot z'wyt wäg!

Mir findes zimmlig Niveaulos, drumm kriegsch uns nie dört ane
Me hett scho alles usprobiert, sogar mol mitme Krane
Si kriegt vo uns am wenigschte Pynggt vo allne schwizer Stedt
Doch halt, do fallt uns i welle Vorteil Zyri hett

.....es isch so wyt wäg, es isch so wyt wäg...!!!!!!!
© Fäldschnäggli `04

D’Helge het gmolt dr Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

Aktuell sind 68 Gäste und keine Mitglieder online