Schnitzelbängg 2003


Jä, s’ Wätter schpielt verruggt, s’ Wätter macht, was es will,
im Dezämber und im Mai, nid nur im April,
dr Petrus, dä schpinnt, was dä macht isch numme Pfusch,
macht s‘Wätter no dr Petrus oder isch das au dr Bush
© Fäldschnäggli `03

Version Oberwil:
Jä, me könnti meine, si wurde immer penne,
die miede Terrorischte, wo sich Schlöfer nenne,
wenn wirgglig alli Schlöfer Terrorischte sin,
denn hets bi uns im Gmeindrot aber au vo sälle din.
© Fäldschnäggli `03

Version Basel:
Jä, me könnti meine, si wurde immer penne,
die miede Terrorischte, wo sich Schlöfer nenne,
wenn wirgglig alli Schlöfer Terrorischte sin,
denn hets bi uns im Regierigsrot au vo sälle din.
© Fäldschnäggli `03

Version Oberwil:
Jä, do in däm Dorf, do duet me uns guet kenne,
will mir als Schnitzelbangg vo Beiz zu Beiz dien renne,
Dütschland suecht e Superstar, dört mache mir nid mit,
will’s dört nach em singe kei Wysse z’ suffe git.
© Fäldschnäggli `03

Version Basel:
Jä, do in däre Stadt, do duet me uns guet kenne,
will mir als Schnitzelbangg vo Beiz zu Beiz dien renne,
Dütschland suecht e Superstar, dört mache mir nid mit,
will’s dört nach em singe kei Wysse z’ suffe git.
© Fäldschnäggli `03

Version Oberwil:
Jä, dr Viggtor Giacobbo beändet syni Sändig,
dr Rudi Carrell goht au, no so halb lebändig,
unser Dreyfuess Ruthli het s’Bundeshuus verloh,
gsehn sy’s nit, Herr Mohler, dr Trend isch do zum Goh.
© Fäldschnäggli `03

Version Basel:
Jä, dr Viggtor Giacobbo beändet syni Sändig,
dr Rudi Carrell goht au, no so halb lebändig,
unser Dreyfuess Ruthli het s’Bundeshuus verloh,
gsehn sy’s nit, Herr Tschudin, dr Trend isch do zum Goh.
© Fäldschnäggli `03

Jä, s’letscht Joor isch är uns’re Held gsi, het alli übertrumpft,
doch das Joor isch är leider e bizeli abgsumpft,
drum hän mir do e Tipp, Simi, es wird langsam Zyt,
zieh d’Goldmedaille ab, denn fliegsch au wieder wyt!
© Fäldschnäggli `03

Jä, mir kömme grad vom Sumpfhuus, mir sin dört au go singe,
hän alles gäh zum e bitzli Stimmig ine  z'bringe,
denn hän mir gmerkt, s' isch dunggel, usser uns isch niemerts do,
genau glich het's do usgseh, wo mir im letschte Joor syn ko.
© Fäldschnäggli `03

Jä, in Davos am WEF will d’Calmy-Rey dr Pauli Colin gseh,
dr Irak go disggutiere, vilicht no bizli me,
tatsächlig kunnt’s zum Träffe im’ne Hotelzimmer,
do sait dr Paul zur Calmy, live bisch jo no vil schlimmer.
© Fäldschnäggli `03

Version Oberwil:
Jä, d’EXPO isch verbi, mir hän sy super gfunde,
die Landesusstellig by uns im Wälsche unde,
öbbis isch erhalte blibe und uf Oberwil ko,
die komisch Warteplage, wo jetzt am Bahnhöfli duet stoh.
© Fäldschnäggli `03

Version Basel:
Jä, d’EXPO isch verbi, mir hän sy super gfunde,
die Landesusstellig by uns im Wälsche unde,
öbbis isch erhalte blibe und uf Basel ko,
die komisch Warteplage, wo jetzt am Bahnhof duet stoh.
© Fäldschnäggli `03

Jä, wenn Du s’Auto duesch parggiere, denn muesch massiv studiere,
wie di neui Parggschiebe richtig sötti funggtioniere,
so unverständlig wie die Schiebe s’Pargge neu duet regle,
isch’s au e grosses Rätsel, wieso mir plötzlig könne segle.
© Fäldschnäggli `03

Si, Asereche he hadehe ha hibidihi ha hibediha,
habedihu habediho habediha tralala,
habedihui habedihoi habedihi habediho,
e sone Seich muesch singe zum in d’Hitparade ko.
© Fäldschnäggli `03

Jä, In d’ Bärge hän mir welle, e bitz uf d’ Schi go stoh,
doch für ihri Schanze hän uns d’ Schwobe dr Schnee gno,
Drum göhn mir jetzt uf Spanie und ligge dört an Strand,
dört bruchsch kei Sunnegrem, dört liggt s’ Öl scho uf em Sand.
© Fäldschnäggli `03

Är isch e wundervolls Kunschtwärk, was für e Pracht,
mir hoffe ehrlig gseit, dass dä nie zämme kracht,
ändlig hän mir öbbis, wo die ganzi Wält will gseh,
mir meine nit dr Mässeturm, nei dr FCB!
© Fäldschnäggli `03

D’Helge het gmolt dr Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

Aktuell sind 22 Gäste und keine Mitglieder online