Schnitzelbängg 2002

 

Version Oberwil:
Z' Oberwil gits e Lade, e grosse und e neue,
Dört gits vill tolli Sache, wo mir uns drüber freue,
Richtig untertauche zwüsche de Regal kasch in däm Lade,
Sag emol, Osama, wo verstecksch di denn du Made.
© Fäldschnäggli `02

Version Basel:
Z' Basel gits e Lade, e grosse und e neue,
Dört gits vill tolli Sache, wo mir uns drüber freue,
Richtig untertauche zwüsche de Regal kasch in däm Lade,
Sag emol, Osama, wo verstecksch di denn du Made.
© Fäldschnäggli `02

Mit so richtig schöne Blueme und so richtig schöne Schwelle,
het me s' Tempo 30 z' Oberwil yfiehre welle,
Nüt isch dodruss worde, s' Stimmvolk isch drgege gsi,
Als Ersatz legge mir jetzt d' Beführworter hi.
© Fäldschnäggli `02

TV3 und Tele24, beidi sin jetzt Gschicht,
sowohl bim einte wie bim andere isch dr Lade dicht,
Ob mir die dien vermisse, das het me uns gfroggt,
Aber nai uns freut doch jede Zürcher wo uns nümme bloggt.
© Fäldschnäggli `02

Mir hän kei neui Larve und trage die gliche Lümpe,
Mir trinke numme Wasser und rauche keini Stümpe,
Uns fählt s' Gäld überall, mir mien do insistiere,
dr Bundesrot söll uns doch eifach d' Fasnacht finanziere.
© Fäldschnäggli `02

Si sin Tabälleerschte, hän kei Loch in dr Kasse,
öbbis Negativs bim FCB – nei, do mien mir passe,
drmit's au öbbis z' singe git hän mir denn in dr Nacht,
In Rase vom St. Jakobs Park e huffe Löcher gmacht.
© Fäldschnäggli `02

S' Militär weiss nit, ob's no sott und ob's no will,
um die Armeeabschaffig wird's und wird's nit still,
im Momänt sott's doch eigentlig dr Armee am Beschte goh-
jetzt wo d'Jugend sälte blöd isch und sich erscht no gärn duet schloh!
© Fäldschnäggli `02

15 und 19, 28, 31,
45, 56, es macht uns richtig schissig,
wenn's d'Lottozahle wäre, wäre mir no guet drby,
aber es syn leider wieder mol unsri Skifahrer gsi!
© Fäldschnäggli `02

Arme Christian, oh arme Christian Gross,
wieso denn arme Gross, was isch denn mit uns los?
Au wenn är unsre FCB zum Meischtertitel tribt,
Tatsach isch, dass är trotz allem Zircher blibt!
© Fäldschnäggli `02

Dr Bundesrot will jetzt dr Hanf legalisiere,
s'Hanfverbot duet eh scho lang kai Schwein me interessiere,
über de Wolgge fliege, kasch denn mit däm Shit-
denn isch’s au nid so schlimm, wenn’s d’Swissair nümme git.
© Fäldschnäggli `02

Jä, dr Harry Potter isch e glatte nätte Burscht,
und schyns praggtisch niemerem, isch das Biebli Wurscht,
ka zaubere ka fliege, wär wotti das nit,
hätt dr Corti das au könne, wäri d'Swissair hüt no fit.
© Fäldschnäggli `02

Immer gwaltbereiter syn neuschtens unseri Junge,
neuerdings wird gschlage statt e Liedli gsunge,
wenn ständig ein an Grind kriegsch, hänn mir uns do dänggt,
isch's jo logisch, das’s zum schriibe und zum Läse nümme längt!
© Fäldschnäggli `02

Vermehrt uf unsre Stroosse dien sy Blitzkäschte baue,
zum uns s'Autifahre z'vermise und z'versaue,
mir hän kai Ahnig, was sott luschtig sy do dra:
Me muess jo Autifahre, wenn me nümme fliege ka!
© Fäldschnäggli `02

Mir syn ins Usland gange, mit unsre Schwizer Frangge,
aber nummeno mit Euro, ka me dörte tangge,
ei Fall aber git's und dört kunnt das nit druf a:
by dr Swissair, will me ohni Gäld, gar nit tangge ka!
© Fäldschnäggli `02

Dr Kurt und s'Ruthli Thüring hänn dr Schlüssel verloh,
dr Schlüssel vom Schlüssel abgäh, sy syn jetzt nümme do,
umbaut wird e Joor, das isch e wirgglig langi Zyt,
warum dr Wärgghof das muess mache, verstöhn mir eifach nit!
© Fäldschnäggli `02

Mir sin imne Museum gsi, was für e Freud, Juhee,
dört isch e sone Bild ghängt und das hän mir druff gseh:
Ein het e schwarzi Chute a, das muess dr Pfarrer sy,
Dr ander mit em wisse Schurz luegt wie ne Doggter dry,
dä mit em behelmte Chopf, dä schafft als Füürwehrmaa,
dr ander dört, wo d‘ Stroos vermisst, het ein z’viel trungge gha,
Die hämmer alli richtig tippt jetzt git’s e bitz Applaus,
Aber dä do mit em lange Bart isch nid dr Santiglaus.
© Fäldschnäggli `02

S‘ letscht Johr hän mir euch versproche, mir bringe s‘ nägschte mol,
d‘ Pointe vom letschte Värs mit, und ihr hän gseit: jä toll,
jetzt sind ihr sicher alli wieder do und wartet sicher gspannt,
villicht händ ihr’s au gmerkt, mir hän euch in dr Hand,
Jä schmeckt denn ihres Ässe, wie isch denn do dä Wyy,
dusse isch übrigens dr Daag scho lang verbii,
s‘ nützt alles nüt es isch sowit, mir miens euch jetzt halt sage,
d‘ Pointe isch z‘ schwer gsi, mir hän se nümme möge trage.
© Fäldschnäggli `02

50 Joor Fäldschnäggli - me ka das gar nit glaube,
e Frächheit, dass uns s'Comité s'Jubiläum jetzt will raube,
doch halt grad im Momänt, do fallt's uns wieder y:
nur nach dr Fasnacht hänn mir s‘ Gfühl vo 50 Joor drby!
© Fäldschnäggli `02

D’Helge het gmolt dr Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

Aktuell sind 64 Gäste und keine Mitglieder online